Капліца Маці Божай Ружанцовай (Беліца)

Капліца Маці Божай Ружанцовай — помнік архітэктуры першай чвэрці XIX стагодзьдзя ў Беліцы. Знаходзіцца на паўднёва-заходняй ускраіне колішняга мястэчка, на старых могілках. Дзее. Твор традыцыйнай беларускай драўлянай архітэктуры. Аб’ект Дзяржаўнага сьпісу гістарычна-культурных каштоўнасьцяў Беларусі.

Гэтая назва мае некалькі сэнсаў. Калі вас цікавяць іншыя сэнсы, глядзіце таксама Капліца Маці Божай Ружанцовай (неадназначнасьць).

Помнік сакральнай архітэктуры
Капліца Маці Божай Ружанцовай
Капліца Маці Божай Ружанцовай
Краіна	Беларусь
Вёска	Беліца
Каардынаты	53°38′54.68″ пн. ш. 25°18′45.6″ у. д.
Канфэсія	каталіцтва
Статус	Дзяржаўны сьпіс гісторыка-культурных каштоўнасьцяў Рэспублікі Беларусь
Капліца Маці Божай Ружанцовай на мапе Беларусі Капліца Маці Божай Ружанцовай

Гісторыя

Драўляную могілкавую капліцу ў Беліцы каля 1824 году збудавалі манахі-дамінікане.

У 1990-я гады капліцу падоўжылі ў алтарным кірунку, павялічыўшы яе даўжыню амаль удвая. 2 жніўня 1992 году капліцу асьвяціў біскуп Аляксандар Кашкевіч.

Архітэктура

Помнік традыцыйнай беларускай драўлянай архітэктуры. Гэта прастакутны зруб з 3-граннай алтарнай часткай, арыентаванай на паўночны захад, да якой з правага боку далучаецца закрысьція. Зруб накрываецца 2-схільным дахам з вальмамі над алтаром і завяршаецца чацьверыковай шатровай вежай над уваходам. У нішы ўваходнага франтону ад пачатку існаваньня капліцы стаіць разьбяная фігура Сьвятога Яна Непамука.

Унутраная прастора перакрываецца роўнай падшыўной стольлю. Галоўны алтар з тытульным абразом Маці Божай Ружанцовай меў дзьве алтарныя кампазыцыі: налева — Найсьвяцейшай Панны Марыі (абраз у срэбнай шаце, перавезены зь зьнішчанай філіі ў Крывічах) і фігура Маці Божай, направа — Маці Божай Вострабрамскай і фігура Пана Езуса. Таксама ў капліцы захоўваўся вялікі абраз Сьвятога Юрыя з галоўнага алтара беліцкага касьцёла і вялікі абраз Сьвятой Сям’і зь Ельні.

Побач з капліцай стаіць каркасная шатровая званіца пірамідальнай формы^[1].