Каталіцтва ў Сэрбіі

Каталіцкая Царква ў Сэрбіі зьяўляецца часткаю Паўсюднай (Сусьветнай) каталіцкай царквы, якую ўзначальвае Рымскі архірэй. Паводле вынікаў перапісу насельніцтва 2011 году, колькасьць каталікоў у Сэрбіі складае 356 957 чалавек, то бок ня больш за 5% насельніцтва. Рыма-каталікі, што жывуць у Сэрбіі, пераважна сканцэнтраваныя ў некалькіх адміністрацыйных адзінках на поўначы Ваяводзіны й належаць да нацыянальных меншасьцяў (напрыклад, зьяўляюцца этнічнымі вугорцамі ці харватамі).

Адміністрацыйны падзел Рымска-каталіцкага касьцёлу ў Сэрбіі

     Бялградзкая архідыяцэзія

     Субаціцкая дыяцэзія

     Зрэнянінская дыяцэзія

     Срэмская дыяцэзія

     Прызрэнская апостальская адміністратура

Герархія ды адміністрацыйны падзел

Рымска-каталіцкая царква ў межах Сэрбіі складаецца з адное архідыяцэзіі, трох дыяцэзіяў ды адное апостальскае адміністратуры.

Назва	(Арцы)біскуп	Дата заснаваньня	Катэдра	Спасылка
Бялградзкая архідыяцэзія Beogradska nadbiskupija	Станіслаў Хочэвар	1914	Катэдра Найсьвяцейшай Панны Марыі ў Белградзе Конкатэдра Хрыста Цара ў Белградзе
Субаціцкая архідыяцэзія Subotička biskupija	Янаш Пэнзэш	1923	Катэдра сьвятой Тэрэзы Авільскай у Субоціцы
Зрэнянінская дыяцэзія Zrenjaninska biskupija	Ласла Нэмэт	1923	Катэдра сьвятога Яна Непамуцкага ў Зрэняніне
Срэмская дыяцэзія Srijemska biskupija	Дзюра Гашпаравіч	2008	Базыліка сьвятога Зьмітра ў Срэмскай Мітравіцы
Прызрэнская апостальская адміністратура Apostolska administratura u Prizrenu	Додэ Гергі	2000	Катэдра Маці Божай Нястомнай Дапамогі

Апроч гэтых структураў, у 2002 годзе быў заснаваны Грэка-каталіцкі апостальскі экзархат Сэрбіі й Чарнагорыі. У 2013 годзе юрысдыкцыя гэтага экзархату абмежаваная тэрыторыяю Сэрбіі.^[1]

Срэмская дыяцэзія ёсьць суфраганнаю (адміністрацыйна падпарадкоўваецца) дзякаўска-осіецкай архідыяцэзіі ў Харватыі. Рыма-каталікі на тэрыторыі Косава (дзе ў 2008 годзе была створаная часткова прызнаная незалежная ад Сэрбіі дзяржава) з 2000 году належаць да Прызрэнскай апостальскай адміністратуры^[2], юрысдыкцыя якое пашыраецца таксама на частку этнічных альбанцаў паўднёвай Сэрбіі.

Статыстыка

Колькасьць каталікоў у Сэрбіі

	Перапіс 1921.[3]		Перапіс 1991.		Перапіс 2002.		Перапіс 2011.
	Колькасьць	%	Колькасьць	%	Колькасьць	%	Колькасьць	%
Каталікі	751 429	17,16	496 226	6,4	410 976	5,48	356 957	4,97
Насельніцтва цалкам	4 378 595	100	7 759 571	100	7 498 001	100	7 186 862	100

Біскупская канфэрэнцыя сьвятых Кірылы й Мятода

Асноўны артыкул: Міжнародная біскупская канфэрэнцыя сьвятых Кірылы й Мятода

Міжнародная канфэрэнцыя біскупаў сьв. Кірылы й Мятода — міжнародная канфэрэнцыя каталіцкіх біскупаў, якая аб’ядноўвае Сэрбію, Косава, Чарнагорыю й Македонію. Каталіцкія біскупы з гэтых чатырох краінаў зьяўляюцца сталымі чальцамі Канфэрэнцыі. Два біскупы — чальцы Канфэрэнцыі Кірыла й Мятода зьяўляюцца апостальскімі экзархамі для каталікоў бізантыйскага абраду. Паводле зьвестак на 2012 год Канфэрэнцыю ўзначальвае арцыбіскуп барскі Зэф Гашы. Канфэрэнцыя сьв. Кірылы й Мятода зьяўляецца чальцом Эўрапейскай рады біскупскіх канфэрэнцыяў.