Крыж Заслугі БКА

Крыж Заслугі БКА — вайсковая ўзнагарода зацьверджаная Прэзыдэнтам БЦР Радаславым Астроўскім для жаўнераў Беларускае краёвае абароны.

Крыж Заслугі БКА
Краіна	Беларуская Народная Рэспубліка
Тып	мэдаль
Каму ўручаецца	беларусам-прыхільнікам БЦР
Падставы ўзнагароджаньня	служэньне ў БКА
Статус	не ўручаецца
Статыстыка
Дата заснаваньня	10 кастрычніка 1976 году

Мінуўшчына

10 кастрычніка (паводле Мазырэца 10-14 кастрычніка) 1976 году Радаслаў Астроўскі (за тыдзень да сваёй сьмерці) зацьвердзіў тры ўзнагароды БКА. Другой зь іх, паводле парадку пераліку, быў Крыж Заслугі БКА.

Усе тыя ўзнагароды выкарыстоўваліся для ганараваньня беларусаў з шэрагу прыхільнікаў Беларускае Цэнтральнае Рады на эміграцыі. Разам з тымі мэдалямі выдаваліся дыплёмы.

Апісаньне

Крыж меў зялёную стужку, у ягоным цэнтры выява Пагоні, а на канцах літары БКА і год 1944 (год заснаваньня БКА). На адваротным баку замест Пагоні ў цэнтры надпіс БЦР. Вырабляўся крыж з бронзы.

Цікавосткі

• Былі таксама праекты залатых, срэбраных і жалезных крыжоў заслугі
• Асобнік Крыжа Заслугі БКА захоўваецца ў Беларускім інстытуце навукі і мастацтва.

Вонкавыя спасылкі

• Значкі, жэтоны, мэдалі
• Мазырэц Ц. Узнагароды Беларусі