Леў, Вядзьмарка і Адзежная шафа

«Леў, Вядзьма́рка і Адзе́жная ша́фа» (па-ангельску: The Lion, the Witch and the Wardrobe) — эпічны фэнтэзійны раман для дзяцей К. С. Льюіса, упершыню апублікаваны ў 1950. Гэтая кніга стала першай зь сямі раманаў пад агульнай назвай «Хронікі Нарніі» (1950—1956). Пазьней Льюіс напісаў адзін з твораў сэрыі, які папярэднічаў падзеям «Льва, Вядзьмаркі й Адзежнае шафы», таму першым паводле храналёгіі стаў раман «Пляменьнік чарадзея».

Леў, Вядзьмарка і Адзежная шафа
The Lion, the Witch and the Wardrobe
Жанр:	Дзіцячы фэнтэзійны раман, хрысьціянская літаратура
Аўтар:	Клайв Льюіс
Мова арыгіналу:	ангельская
Публікацыя:	16 кастрычніка 1950
Выдавецтва:	Geoffrey Bles
Сэрыя:	Хронікі Нарніі
Колькасьць старонак:	172
Ілюстратар:	Паўліна Бэйнз
Носьбіт:	кніга (цьвёрдая вокладка)
Папярэдні твор:	Пляменьнік чарадзея
Наступны твор:	Прынц Касьпіян
ISBN:	978-0-00-671677-8

Большая частка дзеяў твору адбываюцца ў Нарніі, выдуманай краіне, дзе размаўляюць жывёлы, а сьветам вось ужо сто гадоў кіруе Белая Вядзьмарка, якая стварыла ў Нарніі вечную зіму. У перадгісторыі чатыры ангельскія дзіцёнкі жывуць у вялікім загарадным доме, ратуючыся ад бамбаваньня Лёндану ў Другой сусьветнай вайне. Малодшая зь дзяцей адкрывае праход у Нарнію праз адзежную шафу ў закінутым пакоі. У трэцяе ейнае наведваньне ў чароўную краіну выпраўляюцца ўсе чацьвёра, пасьля чаго падзеі разьвіваюцца выключна там амаль да самага канца гісторыі. У Нарніі дзеці павінны спраўдзіць старажытнае прароцтва, і яны апынаюцца ў барацьбе за выжываньне і за вызваленьне краіны ад чараўніцтва.

Часопіс «Time» уключыў раман у свой сьпіс лепшых раманаў усіх часоў, куды ўваходзяць ангельскамоўныя творы 1923—2005 рокаў^[1]. Кніга перакладзеная на 47 моваў^[2].