Мікалай Крыштап Халецкі

Мікалай Крыштап Халецкі (каля 1589 — 7 красавіка 1653^[2]) — дзяржаўны дзяяч Вялікага Княства Літоўскага. Мечнік вялікі літоўскі (1615—1650), ваявода наваградзкі (з 1650)^[3]. Трымаў Алькеніцкае, Ляйпунскае, Аліцкае староствы.

Мікалай Крыштап Халецкі

Герб «Халецкі»
Асабістыя зьвесткі
Нарадзіўся	каля 1589
Памёр	7 красавіка 1653
Пахаваны	Алькенікі[1]
Род	Халецкія
Бацькі	Дзьмітры Халецкі Рэгіна з Дыбоўскіх
Дзейнасьць	вайсковец, палітык

Біяграфія

Сужэнцы Марыя Элеанора і Мікалай Крыштап Халецкія. Невядомы мастак, XVII ст.

З шляхецкага роду Халецкіх, сын Дзьмітрыя, падскарбія вялікага літоўскага, і Рэгіны з Дыбоўскіх.

Навучаўся ў Вільні, працягнуў атрыманьне адукацыі ў Лёвэне (Галяндыя) і парыскай Сарбоне, дзе атрымаў «вянок мудрасьці» («Laurea Corona Sapientiae») і званьне «Vertex Liberalium Artium» за дасягненьне дасканаласьці ў вольных навуках. Тамака ж, у сталіцы Францыі, апублікаваў свой першы твор — панэгірык у гонар Яна Замойскага.

Каралеўскі дваранін. 18 разоў абіраўся паслом на соймы.

Удзельнічаў у войнах супраць Швэцыі (1617—1618), калі пры штурме Парнава прабіўся да ягоных муроў і першым узарваў пэтарду^[4], і Маскоўскай дзяржавы (1609—1618). У Алькеніках трымаў кузьню і пушкарню, якія забясьпечвалі зброяй войска Вялікага Княства Літоўскага^[5].

Асноўныя творы

Аўтар шэрагу твораў, у тым ліку:

• Alegorie (1618);
• Binarius Chalecianus sive duo manipuli liliorum (1642).