Помнік Тадэвушу Касьцюшку (Залятурн)

Помнік Тадэвушу Касьцюшку — статуя, усталяваная асацыяцыяй беларусаў у Швайцарыі ў швайцарскім горадзе Залятурне, з нагоды 200-годзьдзя з дня сьмерці Тадэвуша Касьцюшкі.^[1] Помнік уяўляе сабой бронзавую постаць вышынёй 181 см.^[2] Знаходзіцца ў сквэры ля пратэстанцкай царквы Залятурну.

Гэтая назва мае некалькі сэнсаў. Калі вас цікавяць іншыя сэнсы, глядзіце таксама Помнік Тадэвушу Касьцюшку.

Помнік
Помнік Тадэвушу Касьцюшку ў Залятурне
Толькі што адкрыты помнік Т. Касьцюшку ў Залятурне (21 кастрычніка 2017 г.)
Краіна	Швайцарыя
Места	Залятурн
Дата заснаваньня	2017

Гісторыя

Ідэя ўсталяваць помнік Тадэвушу Касьцюшку, які некаторы час жыў і памёр у Залятурне, узьнікла ў 2010 годзе і належыць былому амбасадару Беларусі ў Швайцарыі Андрэю Кулажанку, а рэалізацыя стала магчымай, дзякуючы намаганьням Беларускага аб’яднаньня ў Швайцарыі^[2]. 17 кастрычніка 2017 году помнік быў усталяваны^[3], а 21 кастрычніка таго ж году адбылося ягонае ўрачыстае адкрыцьцё, на якім, у т. л., прысутнічалі ганаровыя госьці зь Беларусі, Польшчы, Летувы^[4], а таксама прадстаўнікі беларускай дыяспары з розных краінаў.

Скандал вакол помніку

Помнік быў выраблены на сродкі Беларускага аб’яднаньня ў Швайцарыі і сям’і Сапегаў у прыватнасьці. Першапачаткова на помніку плянавалася зрабіць надпіс па-нямецку і па-беларуску, які павінен быў выглядаць наступным чынам:

	Zu Ehren von Tadevuš Kaściuška 04.02.1746 — 15.10.1817 dem hervorragenden Sohn Belarus' von dankbaren Landsleuten. Belarussische Vereinigung in der Schweiz 2017

	Тадэвуш Касцюшка 04.02.1746 — 15.10.1817 Выдатнаму сыну Беларусі ад удзячных суайчыннікаў. Беларускае аб’яднанне ў Швейцарыі 2017

^[5]

Аднак падобны надпіс не задаволіў польскі бок, і амбасадар Польшчы ў Швайцарыі Якуб Кумах прымусіў мэрыю Залятурну выкрасьліць з шыльды ўсе згадкі пра Беларусь і беларускамоўную вэрсію^[5]. І толькі пасьля ўмяшальніцтва Міністэрства замежных справаў Беларусі быў знойдзены кампрамісны варыянт, які цяпер выглядае так:

	Tadeusz Kosciuszko 04.02.1746 — 15.10.1817 von der Belarussischen Vereinigung in der Schweiz 2017

	Тадэвуш Касцюшка 04.02.1746 — 15.10.1817 ад Беларускага аб’яднання ў Швейцарыі 2017

^[6]

Акрамя таго, падчас урачыстай цырымоніі адкрыцьця помніку прадстаўнікі беларускай дыяспары трымалі расьцяжку з надпісам: «Выдатнаму сыну Беларусі ад удзячных суайчыннікаў».

Дадатковыя зьвесткі

Канфлікт з польскім бокам вакол помніку ў Залятурне падштурхнуў беларусаў да збору сродкаў на помнік Т. Касьцюшку на ягонай радзіме, у Марачоўшчыне^[6].

Галерэя

• 
  Помнік Тадэвушу Касьцюшку ў Залятурне за некалькі хвілін да ўрачыстага адкрыцьця
• 
  Шыльда ля помніку Тадэвушу Касьцюшку ў Залятурне
• 
  Прадстаўнікі беларускай дыяспары падчас урачыстага адкрыцьця помніку Тадэвушу Касьцюшку ў Залятурне
• 
  Асьвячэньне помніку Тадэвушу Касьцюшку ў Залятурне
• 
  Асьвячэньне помніку Тадэвушу Касьцюшку ў Залятурне