Прэзыдэнцкія выбары ў Грузіі 2013 году

Прэзыдэ́нцкія вы́бары ў Грузіі адбыліся 27 кастрычніка 2013 року. Гэта шостыя прэзыдэнцкія выбары ў дзяржаве пасьля аднаўленьня незалежнасьці ад СССР у 1991. Папярэдні прэзыдэнт Міхаіл Саакашвілі ня меў права браць удзел у выбарах, паколькі канстытуцыя Грузіі забараняе займаць гэтую пасаду больш чым два разы запар.

← 2008   2018 →
Прэзыдэнцкія выбары ў Грузіі 2013 году
27 кастрычніка
Кандыдат	Георгі Маргвелашвілі	Давіт Бакрадзэ	Ніно Бурджанадзэ
Партыя	Грузінская мара	Адзіны нацыянальны рух	Дэмакратычны рух — Адзіная Грузія

Па інаўгурацыі новаабранага прэзыдэнта набудуць моц прынятыя парлямэнтам у 2010—2013 папраўкі ў канстытуцыю, якія значна абмяжоўваюць прэзыдэнцкія паўнамоцтвы на карысьць прэм’ер-міністра і ўраду^[1].

Перадгісторыя

На парлямэнцкіх выбарах у кастрычніку 2012 року прапрэзыдэнцкая партыя Адзіны нацыянальны рух страціла большасьць, якую заваявала кааліцыя Грузінская мара на чале зь Бідзінам Іванішвілі, які стаў новым прэм’ер-міністрам.

Адзіны нацыянальны рух зладзіў папярэднія выбары дзеля вылучэньня кандыдата на прэзыдэнцтва. У гэтых праймэрыз перамог Давіт Бакрадзэ^[2].

12 чэрвеня пра свой намер балятавацца абвясьціла Ніно Бурджанадзэ^[3].

Кандыдаты

23 верасьня Цэнтральная выбарчая камісія Грузіі зарэгістравала 23 кандыдаты ў прэзыдэнты, хоць Акакі Асатыяні абвясьціў пра зьняцьце ўласнай кандыдатуры на карысьць Ніно Бурджанадзэ. 10 кандыдатаў вылучаныя ад палітычных партыяў, а 13 — незалежнымі ініцыятыўными групамі^[4][5]:

• Міхаіл Салюашвілі
• Нэстан Кіртадзэ
• Шалва Натэлашвілі (Лейбарысцкая партыя Грузіі)
• Мамука Чаханэлідзэ
• Георгі Таргамадзэ (Хрысьціянска-дэмакратычны рух)
• Сярго Джавахідзэ («За справядлівую Грузію»)
• Георгі Лілюашвілі
• Ляван Чачуа
• Аўтандыл Маргіяні
• Мамука Мелікішвілі
• Нугзар Аваліяні
• Тэймураз Бабахідзэ
• Тамаз Бібілуры
• Давіт Бакрадзэ (Адзіны нацыянальны рух)
• Георгі Маргвелашвілі («Грузінская мара»)
• Коба Давіташвілі (Партыя народу)
• Акакі Асатыяні (Зьвяз традыцыяналістаў Грузіі)
• Ніно Бурджанадзэ (Дэмакратычны рух — Адзіная Грузія)
• Ніно Чанішвілі
• Зураб Харатышвілі («Эўрапейскія дэмакраты Грузіі»)
• Картлёс Гарыбашвілі
• Тэймураз Мжавія (Хрысьціянска-дэмакратычная народная партыя)
• Георгі Чыгладзэ

Вынікі

У выніку выбараў большасьць галасоў выбарцаў атрымаў Георгі Маргвелашвілі — 62,11% галасоў, апярэдзіўшы Давіда Бакрадзэ з 21,73% і Ніно Бурджанадзэ, якая атрымала 10,18%, астатнія кандыдаты не атрымалі больш за 3% адсоткі ад галасоў выбарцаў^[6]. Яўка выбарцаў склала 47%^[7].