Сяргей Выскварка

Сяргей Выскварка (нар. 11 ліпеня 1971; в. Пласток, Любанскі раён) — зьбіральнік, дасьледнік і папулярызатар беларускай народнай танцавальнай культуры, этнахарэограф, этнапэдагог.

Сяргей Выскварка
Дата нараджэньня	11 ліпеня 1971(1971-07-11) (54 гады)
Месца нараджэньня	Любанскі раён, Менская вобласьць, БССР, СССР
Месца вучобы	Беларускі дзяржаўны ўнівэрсытэт культуры і мастацтваў
Занятак	фальклярыст

Жыцьцяпіс

Сяргей Выскварка нарадзіўся ў вёсцы Пласток Любанскага раёна ў вялікай сям’і. Ужо з дзяцінства цікавіўся традыцыйнай культурай і танцамі, з якімі знаёміла родная бабуля. Скончыў Пластокскую сярэднюю школу. З 1991 года працаваў у дамах культуры Любаншчыны. З 1999 года спэцыяліст па фальклоры і этнаграфіі Любанскага раённага цэнтру культуры, мастацкі кіраўнік Любанскага ўзорнага фальклорнага танцавальнага калектыву «Верабейкі» (створаны ў 1993 годзе)^[1]. У 2004 годзе завочна скончыў факультэт Традыцыйнай беларускай культуры і сучаснага мастацтва Беларускага ўнівэрсытэту культуры (сучасны Беларускі дзяржаўны ўнівэрсытэт культуры і мастацтваў). Працуе загадчыкам арганізацыйна-творчага аддзела Любанскага раённага цэнтр3 культуры.

На ніве фальклору

Дасьледуе традыцыйную народную культуру Любаншчыны: запісаў звыш за 400 народных песень, 95 традыцыйных мясцовых танцаў (сярод якіх такія рэдкія творы, як «Войра карагодам», «Каваля» «Кадрыля на пяць штоф»), больш за 15 карагодаў і народных гульняў. Рэканструяваў традыцыйныя «Гасьцявыя кірмашы», абрад «Спальваньне русалкі». Аўтар шматлікіх публікацый, прысьвечаных традыцыйным танцам і фальклору^[2]. На працягу многіх гадоў праводзіць майстар-клясы традыцыйных танцаў. Зьяўляецца куратарам летняй школы традыцыйных танцаў «Пятровіца» (арг. Н. Кухарэнка).

Вядучы шматлікіх сьвят, у тым ліку «Фальклорная вандроўка» (1993, 1998, 2003), «Гліняны звон» (1996), Рэспубліканскі кірмаш «Вясна — 2000» (горад Салігорск), Рэспубліканскае сьвята гумару «Капыльскія пацехі» (1999, 2002) і інш.^[1]

Сям’я

Жанаты з Валянцінай Бубіч. Мае сына Арцёма (1998 г.н.) і дачку Арыну (2005 г.н.).

Бібліяграфія

• «Танцавальны фальклор у традыцыйным вяселлі Любаншчыны» (2001)
• «Спецыфіка танцавальнага фальклору Любаншчыны» (2003)
• «Да пытання захавання і развіцця рэгіянальнай мастацкай культуры» (2003)
• «Комплекснае даследванне фальклорна-этнаграфічных традыцый Любаншчыны» (2003)
• «Беларускі танцавальны фальклор. Методыка працы з дзіцячым факльклорным калектывам» (Мн.: Зміцер Колас, 2015)

Глядзіце таксама

• Любанскія музыкі