Яўген Ціхановіч

Яўген Ціхановіч (25 лістапада 1911 — 5 ліпеня 2005) — беларускі мастак.

Гэтая назва мае некалькі сэнсаў. Калі вас цікавяць іншыя сэнсы, глядзіце таксама Ціхановіч.

Яўген Ціхановіч лац. Jaŭhien Cichanovič
Імя пры нараджэньні	Яўген Мікалаевіч Ціхановіч
Дата нараджэньня	25 лістапада 1911(1911-11-25)
Месца нараджэньня	станцыя Джусалы(ru), Сырдар’інская вобласьць, Туркестанскае генэрал-губэрнатарства(be), Расейская імпэрыя
Дата сьмерці	5 ліпеня 2005(2005-07-05) (93 гады)
Месца сьмерці	Менск
Адукацыя	Віцебскі мастацкі тэхнікум (1932)
Месца вучобы	Віцебская народная мастацкая вучэльня[d] (1932)
Занятак	Графіка, жывапіс
Плынь	Сацыялістычны рэалізм
Узнагароды	Ганаровая грамата Вярхоўнага Савету БССР

Біяграфія

Нарадзіўся на станцыі Джусалы (цяпер Казахстан). Скончыў Віцебскі мастацкі тэхнікум (1932). Ажаніўся з дачкой драматурга Ўладзіслава Галубка — Людмілай^[1].

Браў удзел у мастацкіх выставах з 1932 году. Больш як за 70 гадоў творчай дзейнасьці Яўген Ціхановіч стварыў дзясяткі жывапісных палотнаў, сотні графічных твораў. Аднак творчасьць мастака не выходзіла за рамкі сацрэалізму. Плённа працаваў галіне эстампа (у асноўным лінагравюры), майстар эксьлібрысу. Стварыў эксьлібрыс для кнігазбору паэта Пятра Глебкі^[2]. Удзельнічаў у сусьветнай выставе «ЭКСПО-70» у Японіі. Узнагароджаны дзьвюмя Ганаровымі граматамі і Граматай Вярхоўнага Савету БССР.

Ягоны старэйшы брат Валянцін Ціхановіч быў славутым мастаком-графікам, яго сын Генрых Ціхановіч і ўнук Ян Ціхановіч таксама былі вядомымі мастакамі^[3].

Беларускія нацыянальныя сымбалі

Асноўныя артыкулы: Бел-чырвона-белы сьцяг і Пагоня

У кнізе ўспамінаў «Партрэт стагодзьдзя вачыма мастака» падкрэсьліваў^[4]:

	Бел-чырвона-белы быў заўжды. І ніколі ён не вісеў за немцамі. Цяпер мы маем сьцяг з чырвонага палатна з мусульманскай зялёнай паласою. Апроч гэтай супярэчнасьці ёсьць яшчэ й «беларускі» бардзюрны арнамэнт, які не сустракаецца нідзе… Той — першы — сьцяг БССР меў за ўзор не абы-які, а аўтэнтычны арнамэнт, што выткала сялянка зь Віцебшчыны. Зрэшты, гэтага стваральнікі «новага» сьцяга ня ведалі. І сваімі «карэкціроўкамі» давялі ўсё да абсурду. Дарэчы, ніхто пад сьцягам БССР у вайну не ваяваў. Ён быў прыдуманы адно ў 1955 г., Лукашэнка й тут выявіў сваю недасьведчанасьць… Усё наша, браткі-беларусы, нам вернецца! І наш сьцяг, і «Пагоня». Ня ўсё ж нам заставацца ў савецкай бутафорыі 50-х гадоў!

Бібліяграфія

• Яўген Ціхановіч. Партрэт стагоддзя / Прадмова, падрыхтоўка тэксту Сяргея Харэўскага. — Менск: Лімарыус, 2015. — 532 с. — (Беларуская мемуарная бібліятэка). — 300 ас. — ISBN 978-985-6968-48-1