Іван Васілевіч Яраславіч

Іван Васілевіч Яраславіч (не пазней за 1432 — не раней за 1507 і не пазней за 1509) — маскоўскі і вялікалітоўскі арыстакрат.

Іван Васілевіч Яраславіч
Нараджэнне	не пазней за 1432
Смерць	не раней за 1507 і не пазней за 1509
Род	Бораўскія[d][1]
Бацька	Васіль Яраславіч[2]
Жонка	Еўдакія з Варатынскіх[d][3]
Дзеці	Фёдар Іванавіч Яраславіч[4], Васіліса Іванаўна Яраславіч[d][4] і Ульяна Іванаўна Яраславіч[d][5]

З роду нашчадкаў вялікага князя маскоўскага Івана Каліты, старэйшы сын апошняга ўладарнага серпухоўскага князя Васіля Яраславіча з яго першага шлюбу. Прадзед Васіля Яраславіча — Уладзімір Храбры, быў жанаты з дачкой вялікага князя літоўскага Альгерда — Аленай, то Іван Васілевіч даводзіўся Альгерду прапраўнукам, наогул гэтая галіна роду маскоўскіх князёў была «сваёй» для Ягелонаў. Вялікім князям літоўскім пэўны час (1415—1421) служыў дзед Яраслаў, а Васіль Яраславіч нарадзіўся ў Вялікім княстве Літоўскім.^[6]

У першы ад’езд да Вялікага княства Літоўскага ў 1446 годзе Васіль Яраславіч атрымаў «у вотчыну» Бранск, Гомель, Старадуб, Мсціслаў і «іншыя многія месцы» — значныя ўладанні з адмысловымі ўмовамі надання. Іван Васілевіч у гэты час быў з бацькам.^[6]

У 1456 годзе загадам вялікага князя маскоўскага Васіля Цёмнага серпухаўска-бораўскі князь Васіль Яраславіч зняволены і пазбаўлены ўладанняў. Тое самае напэўна чакала яго другую жонку і сыноў. Малодшыя сыны з другога шлюбу таксама трапілі ў маскоўскую няволю. Жонка са сваім пасынкам — княжычам Іванам Васілевічам збеглі ў Вялікае Княства Літоўскае. Вядома, з улікам свайго статусу, сваяцтва і ранейшай гісторыі сувязяў, яны разлічвалі і мелі добразычлівы прыём.^[6]

Іван Васілевіч атрымаў ад вялікага князя Казіміра спачатку Клецк (не раней за кастрычнік 1456), затым Гарадок Давыдаў (паміж 1471—1484, пасля смерці ўдавы Свідрыгайла — Ганны, якая трымала гэтыя ўладанні) і Рагачоў.^[7]

Спачатку Іван Васілевіч разглядаў сваё быццё ў Вялікім княстве Літоўскім як часовае і разам з таксама збеглым мажайскім князем Іванам Андрэевічаў меў планы вызвалення бацькі і вяртання ўдзела. Аднак, у пачатку сакавіка 1462 года гэтыя намеры выкрылі, з прыхільнікамі Васіля Яраславіча расправіліся, планы былі адкладзены на час або назаўсёды. Прынамсі з наступных гадоў нічога не вядома пра спробы іх ажыццяўлення, хоць, бацька быў у зняволенні амаль 30 гадоў.^[8]

Паміж 1463 і 1471 гадамі ў Клецку нарадзіўся сын Фёдар.^[8]