Алег Уладзіміравіч Хадыка

Алег Уладзіміравіч Хадыка (1 студзеня 1942, Мінск — 11 чэрвеня 2021, Мінск) — беларускі мастацтвазнаўца, рэстаўратар, педагог.

Алег Уладзіміравіч Хадыка
Дата нараджэння	1 студзеня 1942(1942-01-01)
Месца нараджэння	Мінск, Генеральная акруга Беларусь, Рэйхскамісарыят Остланд
Дата смерці	11 чэрвеня 2021(2021-06-11) (79 гадоў)
Месца смерці	Мінск, Беларусь
Род дзейнасці	мастацтвазнавец, захавальнік твораў мастацтва, педагог
Месца працы	БНТУ Міністэрства культуры БССР Беларуская дзяржаўная акадэмія мастацтваў
Альма-матар	архітэктурнае аддзяленне будаўнічага факультэта БПІ (1966)
Член у	Саюз мастакоў БССР
Медыяфайлы на Вікісховішчы

Біяграфія

Рос без бацькі. Скончыў у 1966 годзе архітэктурны факультэт Беларускага політэхнічнага інстытута^[1].

З 1964 года працаваў выкладчыкам архітэктурнага факультэта Беларускага політэхнічнага інстытута. Трохі пазней стаў супрацоўнікам Міністэрства культуры, займаўся прыцягненнем новых кадраў у рэстаўрацыйную сферу Беларусі.

З 1975 года выкладаў на мастацкім факультэце Беларускага дзяржаўнага тэатральна-мастацкага інстытута^[1]. Быў выкладчыкам вядомага беларускага мастака Юрыя Несцярука. У 1981 годзе Алег Хадыка ўнёс уклад у адраджэнне беларускай батлейкі як жанру народнага тэатральнага мастацтва. Прапанаваў стварыць у Смаргонскай кальвінісцкай царкве Музей батлейкі. Яго вучні Алесь Лось і Яўгенія Ліс, студэнты графічнага факультэта БДТМІ, паспяхова рэалізавалі гэтую ідэю.

Алег Хадыка захапляўся мовай ідыш і далучаў да яе сваіх вучняў, у прыватнасці, Аляксандра Астравуха^[2][3]. Уваходзіў у мастацкі савет, які зацвярджаў тэмы, эскізы і выкананне манументальна-дэкаратыўных твораў.

Член Беларускага саюза мастакоў з 1975 года^[1].

Жыў у Мінску^[1]. Памёр 11 чэрвеня 2021 года ў Мінску.

Навуковая дзейнасць

Працаваў у галіне тэорыі мастацтва. Выступаў у рэспубліканскім і замежным друку. Асноўныя работы: артыкулы «Адхіленне ў мастацкай творчасці», «Форма і яе імя», «Мысленны эксперымент у мастацкім праектаванні», «Прыгоды на курорце Сяргея Эйзенштэйна», «Аб жанры архітэктурных фантазій»^[1].

Асноўныя працы

• Праект рэстаўрацыі замкавага комплексу ў гарадскім паселішчы Мір. Прапанаваў сістэму захавання аб’екта.
• Праект рэстаўрацыі інтэр’ерных роспісаў Свята-Петра-Паўлаўскага сабора.
• Праект рэстаўрацыі Камянецкай вежы
• Праект рэстаўрацыі Лідскага замка

Зноскі

1. Хадыка Алег Уладзіміравіч // Беларускі саюз мастакоў, 1938—1998 = Belarussian union of artists, 1938—1998 : Энцыкл. давед. / Аўт.-склад.: Б. А. Крэпак і інш.. — Мн.: ВТАА «Кавалер Паблішэрс», 1998. — 663 с. — 3 000 экз. — ISBN 985-6427-09-6.
2. http://mishpoha.org/n29/29a34.php
3. https://belisrael.info/?p=28667