Антонаўка (Крычаўскі раён)

У паняцця ёсць і іншыя значэнні, гл. Антонаўка.

Анто́наўка (трансліт.: Antonaŭka, руск.: Антоновка) — вёска на тэрыторыі Крычаўскага раёна, знішчаная нямецкімі акупацыйнымі войскамі разам з жыхарамі. Знаходзілася паміж вёскамі Шаеўка і Маляцічы Маляціцкага сельсавета.

Вёска Антонаўка Краіна Беларусь Вобласць Магілёўская Раён Крычаўскі Сельсавет Маляціцкі Каардынаты 53°50′54″ пн. ш. 31°31′33″ у. д.HGЯO Антонаўка Антонаўка

Перад вайной у ёй жыло 115 чалавек^[1]; працаваў яўрэйскі калгас і яўрэі складалі большасць насельніцтва^[2][3].

Вёска была захоплена нямецкімі войскамі 16 ліпеня 1941 года. Большасць мужчын Антонаўкі прызыўнога ўзросту, у тым ліку і яўрэяў, у чэрвені 1941 года мабілізавалі ў Чырвоную армію. Таксама акрамя не паспеўшых ці не здолеўшых эвакуявацца мясцовых яўрэяў, у Антонаўцы апынулася і колькі іх сваякоў, якія прыехалі з дзецьмі ў госці на лета^[2].

Пасля акупацыі нямецкія акупацыйныя ўлады, рэалізуючы нацысцкую праграму знішчэння яўрэяў, арганізавалі ў мястэчку гета. Яўрэям пад пагрозай смерці забаранілі выходзіць без нашытых на верхнім адзенні шасціканцовых зорак. У іх забралі ўсе харчовыя прадукты, хатнюю жывёлу і птушку^[2].

У верасні 1941 года вёска (22 двары) была спалена, а мясцовае насельніцтва забіта (па некаторых дадзеных — 92 жыхары^[1]).

Пасля вайны не адрадзілася.

У 2004 годзе на месцы вёскі ўсталявалі помнік у выглядзе дрэва з абсечанымі галінамі^[2]. Увекавечана ў мемарыяльным комплексе Хатынь.