Данута Іванаўна Бічэль-Загнетава

Данута Бічэль-Загнетава (нар. 3 снежня 1937^[2]/1 студзеня 1938^[3][4], в. Біскупцы Лідскага павета Навагрудскага ваяводства Польшчы) — беларуская паэтэса. Лаўрэат Дзяржаўнай прэміі БССР імя Я. Купалы (1984) за зборнік вершаў «Дзе ходзяць басанож». Узнагароджана медалём. Займаецца грамадскай, літаратурнай, асветніцкай дзейнасцю.

Данута Іванаўна Бічэль-Загнетава
Асабістыя звесткі
Дата нараджэння	3 снежня 1937(1937-12-03)[1] (87 гадоў)
Месца нараджэння	Біскупцы, Лідскі павет, Навагрудскае ваяводства, Польская Рэспубліка
Грамадзянства	СССР  Беларусь
Альма-матар	Навагрудскае педагагічнае вучылішча[d] (1957) Гродзенскі педагагічны інстытут імя Янкі Купалы (1962)
Месца працы	Музей Максіма Багдановіча
Прафесійная дзейнасць
Род дзейнасці	паэт, празаік
Гады творчасці	1960 — цяп. час
Кірунак	лірыка
Жанр	вершы, пераклады, проза
Мова твораў	беларуская
Дэбют	1958
Грамадская дзейнасць
Партыя	Беларускі народны фронт «Адраджэнне»
Член у	Саюз пісьменнікаў СССР Беларускі ПЭН
Прэміі	Дзяржаўная прэмія Беларускай ССР імені Янкі Купалы (1984)

Біяграфія

Нарадзілася ў сялянскай сям’і. Скончыла Навагрудскае педагагічнае вучылішча (1957), аддзяленне беларускай мовы, літаратуры і гісторыі Гродзенскага педагагічнага інстытута імя Я. Купалы (1962). З 1962 года выкладала беларускую мову і літаратуру ў школах Гродна. Член СП СССР (1964). З 1982 загадчыца Дома-музея Максіма Багдановіча ў Гродна. Член Беларускага ПЭН-цэнтра (1989). Вядомая грамадская дзяячка, адна з арганізатараў і актыўных удзельнікаў суполкі Максіма Багдановіча, з верасня 1988 года — член БНФ. Прымала ўдзел у мітынгах, якія праходзілі ў Гродна. Каардынавала дзейнасць рэгіянальных суполак БНФ у Гродзенскай вобласці. Была адным з ініцыятараў выпуску самвыдавецкай газеты «Рэанімова». Уваходзіла ў групу падтрымкі кандыдата ў дэпутаты ВС БССР М. Ткачова (1990).

Творчасць

У друку выступае з 1958^[4] (газета «Літаратура і мастацтва»). У вершах, арганічна звязаных з народна-паэтычнай традыцыяй, апявае Радзіму, жыццё працаўнікоў вёскі, прыгажосць роднай зямлі^[4].

Аўтар зборнікаў паэзіі «Дзявочае сэрца» (1961), «Нёман ідзе» (1964), «Запалянкі» (1967), «Доля» (1972), «Ты — гэта ты» (1976), «Браткі» (1979), «Дзе ходзяць басанож» (1983), «Загасцінец» (1985), «Даўняе сонца» (1987), «А на Палессі» (1990), «Божа, мой Божа» (1992), «Нядзелька» (1998), «Снапок» (1999), «На белых аблоках сноў» (2002), «Стакроткі ў вяночак Божай Маці» (2004), «Нараджэнне Езуса Хрыста, нашага Збаўцы» (2005), «Ойча наш…» (2008), «Iду сцяжынаю да Бога» (2012), «Выбраныя творы»(2016), «Дайсці да Каложы»(2017), «Гускі вяртаюцца» (2019). Напісала паэмы і кнігі вершаў для дзяцей «Перапёлка» (1968), «Грыб-парасон» (1969), «Дзічка» (1971), «Рыжая палянка» (1971), «Дагані на кані» (1973), «Лузанцы» (1982), «Габрынька і Габрусь» (1985), «Гараднічанка» (1993). Аўтар кнігі нарысаў, мемуараў і эсэ «Хадзі на мой голас» (Вроцлаў, 2008), выдала кнігі прозы «Мост святога Францішка» (2010), «Правінцыя святога Францішка» (2013).

Зноскі

1. Visuotinė lietuvių enciklopedija

   <a href='https://wikidata.org/wiki/Track:Q76499581'></a>
2. Дэмакратычная апазіцыя Беларусі. 1956—1991 гг. Персанажы і кантэксты. Рэд. А. Дзярновіч. — Мн., 1999. ISBN 985-6374-08-1.
3. Бічэль-Загнетава Данута // Беларускія пісьменнікі (1917—1990): Даведнік / Склад. А. К. Гардзіцкі. Нав. рэд. А. Л. Верабей. — Мн.: Мастацкая літаратура, 1994. — 653 с.: іл. — 22 000 экз. — ISBN 5-340-00709-X.
4. Бичель-Загнетова Данута Ивановна // Биографический справочник. — Мн.: «Белорусская советская энциклопедия» имени Петруся Бровки, 1982. — Т. 5. — С. 59. — 737 с.