Крэдытная картка

Крэды́тная ка́ртка (разм. крэдытка) — аплатная картка з налічанымі грашыма ў выглядзе пазыкі.

Аплата крэдытнай карткай (2016 г.)

Пазыка налічваецца суадносна ўзроўню дахода трымальніка карткі. Безадсоткавы перыяд, калі за знятыя з карткі грошы адсутнічае выплата адсотку, складае ад 30 да 50 дзён і звычайна адпавядае прамежку між выплатамі зарплаты. У такім выпадку банк зарабляе камісійныя зборы за транзакцыі па картцы. Пры непакрыцці запазычанасці ў безадсоткавы перыяд тая ператвараецца ў спажывецкую пазыку. Тады банк налічвае адсотак за пазыку з сумы выдаткаў пры зняцці наяўных грошай з банкаўскага рахунку і аплаце карткай. Крэдытная картка бывае кабрэндзінгавай, калі прадугледжвае зніжкі ў пэўнай сетцы крамаў^[1]. Як правіла, за зняцце наяўных устаноўлены дадатковая камісія і адсотак, таму больш выгадна з дапамогай крэдытнай карты ажыццяўляць электронныя плацяжы^[2].

Крэдытная картка бывае: асабістай (выдадзена на імя фізычнай асобы) і карпаратыўнай (выдадзена для юрыдычнай асобв або індывідуальнага прадпрымальніка).

На 2013 год у ЗША прыпадала 4,2 крэдытныя карткі на душу насельніцтва. У краінах Заходняй Еўропы — 1,5—2 карткі. У Польшчы за 2005—2011 гады лік крэдытных картак вырас больш як 23-кратна з 300 000 да 7 млн^[1].

Беларусь

На 2018 год «Беларусбанк» спаганяў 1 рубель штомесячнага ўзнагароджання за абслугоўванне крэдытнай карткі «Магніт» і налічваў 0,5 % гадавых са сродкаў на рахунку^[3], «Белгазпрамбанк» спаганяў па «Карце пакупак» 15 рублёў штомесячнай платы за выкарыстанне паслугі «СМС-інфармаванне»^[4].

Зноскі

1. Уладзіслаў Кулецкі. «Пластыкавы» крэдыт // Звязда : газета. — 7 верасня 2013. — № 168 (27533). — С. 2. — ISSN 1990-763x.
2. Крэдытныя карты: асаблівасці і парады (нявызн.)(недаступная спасылка). Архівавана з першакрыніцы 1 кастрычніка 2020. Праверана 9 красавіка 2020.
3. Крэдытная картка «Магніт». ААТ «ААБ Беларусбанк». 2018. Праверана 25 кастрычніка 2018.
4. Аб «Карце пакупак». ААТ «Белгазпрамбанк». 2018. Праверана 25 кастрычніка 2018.