Леанід Пятровіч Данелія

Леанід Пятровіч Данелія (27 сакавіка 1946, Брэст) — беларускі мастак. Заслужаны дзеяч мастацтваў Беларусі (1995).

Леанід Пятровіч Данелія
Дата нараджэння	27 сакавіка 1946(1946-03-27) (79 гадоў)
Месца нараджэння	Брэст, Брэсцкая вобласць, Беларуская ССР, СССР
Бацька	Пётр Аляксандравіч Данелія
Род дзейнасці	мастак
Узнагароды	Заслужаны дзеяч мастацтваў Рэспублікі Беларусь (1995)

У Вікіпедыі ёсць артыкулы пра іншых людзей з прозвішчам Данелія.

Біяграфія

Падлеткам Леанід Данелія займаўся ў студыі выяўленчага мастацва, якую вёў яго бацька, П. А. Данелія. У 1953—1962 гг. вучыўся ў СШ № 3 г. Брэста, у 1963 годзе скончыў вячэрнюю школу рабочай моладзі. У 1963—1965 гг. навучаўся ў Мiнскім мастацкім вучылiшчы імя А. К. Глебава. У час вучобы захапляўся спортам, быў чэмпіёнам г. Мінска па боксу (1964). Спорт не аставіў i цяпер, з’яўляецца членам савета Беларускага грамадскага аб’яднання прафесійнага бокса.

У 1970 годзе Леанід Данелія скончыў дэкаратыўна-прыкладное аддзяленне Беларускага тэатральна-мастацкага iнстытута па спецыяльнасці «Інтэр’ер і абсталяванне». Вучыўся ў Л. Шчамялёва, А. Малiшэўскага, В. Гусева, В. Цвіркі.

Працаваў старшым выкладчыкам на кафедры мастацка-педагагічнай адукацыі факультэта эстэтычнай адукацыі Беларускага дзяржаўнага педагагічнага ўніверсітэта імя М. Танка. Леанiд Пятровiч выкладаў студэнтам дызайн.

Творчасць

Удзельнік многіх мастацкіх выстаў з 1976 года — рэспубліканскіх і замежных (Францыя, Польшча, Германія, Расія). З 1988 года — член Беларускага саюза мастакоў. 21 мая 2008 года ў Мінскім Палацы мастацтваў была адкрыта персанальная выстаўка жывапісу Л. П. Данеліі.

У Леаніда Данеліі шырокія і рознабаковыя інтарэсы. Паэт, музыкант, мастак. Выхаваны ў традыцыях нацыянальнага рэалістычнага мастацтва, ён шукаў свой адметны шлях. Графіка, прыкладное і дэкаратыўнае мастацтва, архітэктура, жывапіс — усё яму знаёма, усё знаходзіць месца ў яго творчасці. У вобразах рамантычнага мастака арганічна спалучаюцца выразныя магчымасці колеру і ліній, дэкаратыўнасць і архітэктоніка.

Мастак працуе ў галіне мастацкага афармлення і праектавання, а таксама ў манументальна-дэкаратыўным і станкавым жывапісе. Леанiд Пятровiч — аўтар праектаў і мастацкі афарміцель інтэр’ераў дома адпачынку «Белая Русь» на возеры Нарач, дзіцячага садка фабрыкі «Элема» ў Мінску (пано, вітраж), гасцінічнага комплексу саўгаса «Заказельскі» Брэсцкай вобласці (дэкаратыўны жывапіс, вітраж, люстры, у сааўтарстве), музея Алімпійскай славы ў Мінску, Бярозаўскі гісторыка-краязнаўчы музей (2013), музей рэдкай кнігі ў БДПУ. Таксама аўтар карцін «Бабіна лета», «На Прыпяці», «Чаканне», «Пачатак. Дарогай волі», «Вераніка».

Творы Л. П. Данеліі знаходзяцца ў Полацкім гісторыка-культурным запаведніку, Беларускім музеі гісторыі Вялікай Айчыннай вайны, фондах БСМ, Музеі сучаснага выяўленчага мастацтва ў Мінску.

Прызнанне

• Член Беларускага саюза мастакоў (1988).
• Заслужаны дзеяч мастацтва Беларусі (1995).

Зноскі