Разведвальная супольнасць ЗША

Разведвальная супольнасць Злучаных Штатаў, РС (англ.: United States Intelligence Community, IC) — зборны тэрмін для абазначэння 17 асобных урадавых устаноў ЗША, перад якімі стаіць задача збору інфармацыі і вядзення разведвальнай дзейнасці. Разведсупольнасць уяўляе сабой дарадчы орган для каардынацыі разведвальных дзеянняў асобных устаноў выканаўчай улады, якія збіраюць тэхнічнымі і агентурнымі сродкамі інфармацыю для абароны нацыянальнай бяспекі.

Разведвальная супольнасць ЗША
Краіна	ЗША
Створана	4 снежня 1981
Штаб-кватэра	Вашынгтон
Кіраўніцтва
Кіраўнік	Avril Haines[d][1]
Сайт	intelligence.gov (англ.)
Медыяфайлы на Вікісховішчы

РС заснавана урадавым распараджэннем № 12333, падпісаным 4 снежня 1981 года прэзідэнтам Р. Рэйганам^[2].

Прызначэнне

Паводле ўрадавага распараджэння № 12333^[3], РС ЗША мае шэсць асноўных мэт:

• Збор інфармацыі, неабходнай для прэзідэнта, Савета нацыянальнай бяспекі, Дзяржаўнага сакратара, міністра абароны і іншых службовых асоб выканаўчай улады для выканання імі сваіх абавязкаў;
• Арганізацыя і развіццё разведкі;
• Збор інфармацыі, якая тычыцца правядзення мерапрыемстваў па абароне нацыянальнай бяспекі, разведвальнай дзейнасці накіраванай супраць краіны, дзеянняў міжнароднага тэрарызму і/або наркотыкаў, а таксама іншых варожых дзеянняў, накіраваных супраць ЗША з боку замежных дзяржаў, арганізацый, асоб і іх агентаў;
• Спецыяльныя мерапрыемствы (вызначаецца як мерапрыемствы, якія праводзяцца ў падтрымку знешнепалітычных задач за мяжой, што плануюцца і ажыццяўляюцца там, дзе «роля ўрада Злучаных Штатаў не з’яўляецца відавочнай або публічна не прызнаная», а таксама функцыі для падтрымкі такіх відаў дзейнасці, але якія не прызначаныя для ўплыву на палітычныя працэсы, грамадскую думку, палітыку ці сродкі масавай інфармацыі і не ўключаюць у сябе дыпламатычную дзейнасць, збор і падрыхтоўку разведвальнай або звязаных з ёй дапаможных функцый);
• Кіраўніцтва і падтрымка дзейнасці разведкі ў ЗША і за мяжой, неабходнай для выканання зацверджаных мерапрыемстваў;
• Іншая разведвальная дзейнасць, якую час ад часу прэзідэнт можа накіроўваць.

Службы і агенцтвы

Разведсупольнасць уключае ў сябе 17 асноўных разведвальных службаў (таксама званых членамі разведсупольнасці ЗША). ЦРУ з’яўляецца асноўнай незалежнай ад іншых міністэрстваў і ведамстваў службай палітычнай разведкі ўрада. Астатнія 16 членаў разведсупольнасці ўваходзяць у склад розных федэральных міністэрстваў і ведамстваў.

Разведвальную супольнасць узначальвае дырэктар Нацыянальнай разведкі (адначасова з’яўляецца саветнікам прэзідэнта па разведцы). Яго апарат — частка супольнасці, але ўяўляе сабой адміністрацыйную, а не разведвальную структуру^[4].

• ЦРУ
• Дзяржаўны дэпартамент
  • Бюро разведкі і даследаванняў
  • Дыпламатычная служба бяспекі
• Міністэрства фінансаў
  • Упраўленне контртэрарыстычнай і фінансавай разведкі
• Міністэрства абароны
  • Разведвальнае ўпраўленне Міністэрства абароны (РУМА)
  • Агенцтва нацыянальнай бяспекі (АНБ)
  • Разведвальнае ўпраўленне арміі
  • Разведвальнае ўпраўленне ВПС
  • Разведвальнае ўпраўленне ВМС
  • Разведвальнае ўпраўленне КМП
  • Нацыянальнае агенцтва геапрасторавай разведкі
  • Нацыянальнае ўпраўленне ваенна-касмічнай разведкі
• Міністэрства энергетыкі
  • Упраўленне разведкі і контрразведкі
• Міністэрства ўнутранай бяспекі
  • Упраўленне разведкі і аналізу
  • Разведвальнае ўпраўленне берагавой аховы
• Міністэрства юстыцыі
  • ФБР
  • Упраўленне па барацьбе з наркотыкамі

Дырэктар Нацыянальнай разведкі

Да 2005 года, разведвальную супольнасць узначальваў дырэктар ЦРУ, пасада якога афіцыйна была Дырэктар Цэнтральнай разведкі. З 21.04.2005 года супольнасць узначальвае Дырэктар Нацыянальнай разведкі, які з’яўляецца саветнікам прэзідэнта ЗША па пытаннях разведкі і саветнікам па разведцы ў Савеце нацыянальнай бяспекі. У яго кампетэнцыю ўваходзяць абавязкі па каардынацыі дзеянняў розных ведамстваў, якія ўваходзяць у разведвальную супольнасць; абавязкі па кіраванні ЦРУ перайшлі да асобна створанай пасады.

У штат дырэктара Нацыянальнай разведкі ўваходзіць Упраўленне дырэктара Нацыянальнай разведкі, намеснікі па зборы інфармацыі, намеснік па аналізе інфармацыі і дырэктар па персаналу; таксама яму падпарадкоўваецца дырэктар ЦРУ.

Дырэктару забаронена наўпрост умешвацца ў работу Міністэрства абароны, Агенцтва нацыянальнай бяспекі і іншых службаў, якія ўваходзяць у супольнасць; яго задача складаецца ў абагульненні інфармацыі. Кіраванне асобнымі ведамствамі супольнасці ажыццяўляецца іх начальнікамі, якія даюць справаздачу перад прэзідэнтам.