Страхавы поліс

Страхавы поліс (англ.: insurance policy, фр.: police, італ.: polizza — распіска, квітанцыя) — як правіла, імянны дакумент, які пацвярджае афармленне дагавора страхавання, выданы страхавой кампаніяй (страхоўшчыкам) страхавальніку (застрахаванаму). Ён таксама змяшчае ўказанне на суб’ектаў страхавых адносін і істотныя ўмовы дагавора страхавання ^[1], напрыклад, від, аб’ект, пачатак і канец дзеяння страхавання, памер страхавой сумы, звесткі аб страхоўшчыку, страхавальніку і іншыя ўмовы^[2]. Поліс выдаецца страхавальніку пасля афармлення дагавора і аплаты страхавой прэміі^[3]. У полісе таксама павінна змяшчацца спасылка на дзейсныя правілы страхавання. Да каштоўных папер страхавы поліс не адносіцца^[1].

Апісанне

Страхавы поліс звычайна павінен утрымоўваць:

• назву дакумента;
• найменне, юрыдычны адрас і банкаўскія рэквізіты страхоўшчыка;
• поўнае найменне ці прозвішча, імя, імя па бацьку страхавальніка і яго адрас;
• указанне аб’екта страхавання;
• памер страхавой сумы;
• указанне страхавой рызыкі;
• памер страхавога ўнёску (унёскаў), тэрміны і парадак яго аплаты;
• тэрмін дзеяння дагавора страхавання, парадак змены і спынення дагавора страхавання;
• іншыя ўмовы па пагадненні бакоў, у тым ліку дадаткі да правіл страхавання, або выключэнні з іх;
• подпісы бакоў.

Поліс страхавання жыцця звычайна ўтрымоўвае ўказанне выгоданабыўцы. У шэрагу відаў страхавання (марское страхаванне, страхаванне маёмасці і іншыя) страхавы поліс можа быць аформлены на прад’яўніка, без указання выгоданабыўцы. У такіх выпадках для ажыццяўлення страхавальнікам ці выгоданабыўцам праў па такім дагаворы неабходна прад’яўленне гэтага поліса страхоўшчыку^[1].

Па асобных відах страхавання дзейнічаюць тыпавыя формы полісаў (напрыклад, формы поліса па абавязковым страхаванні грамадзянскай адказнасці ўладальнікаў транспартных сродкаў і па абавязковым медыцынскім страхаванні).

Пры страхаванні грузаў нароўні з полісам, якія дзейнічаюць на адну партыю груза, могуць ужывацца генеральныя полісы, па якім страхуюцца розныя партыі аднатыпных грузаў. У таксаваным полісе загадзя паказваецца ацэнка кошту застрахаванай маёмасці^[4].