Строй (ваенная справа)

У паняцця ёсць і іншыя значэнні, гл. Строй (значэнні).

Строй^[1] — вызначанае статутам размяшчэнне ваеннаслужачых, вайсковых падраздзяленнеў і часцей для іх сумесных дзеянняў у пешым парадку і на машынах.

Разгорнуты строй у дзве шарэнгі. Англа-савецкі парад у Тэгеране ў верасні 1941 года

Паходны строй караблёў

Паходная калона бронетранспарцёраў. Вяртанне савецкіх воінаў-інтэрнацыяналістаў з Афганістана. Туркменістан, Кушка

Строй забяспечвае хуткае перамяшчэнне войскаў і кіраванне імі. У строі выдзяляюць фронт, тыльны бок, флангі, шырыню і глыбіню. Аснову строю складаюць шарэнгі і лініі машын. Ваеннаслужачыя, падраздзяленні, часці, машыны размяшчаюцца на ўстаноўленых дыстанцыях і інтэрвалах.

Строі падзяляюцца на аднашарэнгавыя і двухшарэнгавыя, паходныя, разгорнутыя, самкнутыя і разамкнутыя, калоны, лініі машын. Строй караблёў: кільватар, пеленг і інш. Строй самалётаў: калона, ромб, змейка і інш.