XXI стагоддзе (бізнес-цэнтр)

«XXI стагоддзе» — бізнес-цэнтр у Мінску, размешчаны па адрасе пр. Незалежнасці, 169, каля з’езду з МКАД. Першы пабудаваны ў Беларусі бізнес-цэнтр.

XXI стагоддзе
Краіна	Беларусь
Месцазнаходжанне	Мінск
Прызначэнне	бізнес-цэнтр
Архітэктурны стыль	неамадэрнізм[d]

У паняцця ёсць і іншыя значэнні, гл. XXI стагоддзе.

Аўтары праекта архітэктары А. Корбут, В. Нікіцін, Зееў Натэс (Ізраіль), Даніэль Бран (Бельгія)^[1]. Узведзены ў 1998 годзе як адміністрацыйны будынак са станцыяй тэхнічнага абслугоўвання і культурна-бытавымі аб’ектамі^[2]. Уведзены ў эксплуатацыю ў 2001 годзе.

Архітэктура

Кампазіцыя «XXI стагоддзе» сфарміравана з двух дугападобных у плане аб’ёмаў — 8- і 9-павярховага, пастаўленых на 2-павярховыя стылабаты, выразна чытаецца ў панараме дзякуючы абагульненым формам, выразнаму кантрасту зашклёных і глухіх паверхняў, кампазіцыйнаму рашэнню. Фасады пабудаваны на спалучэнні люстраных паверхняў шклення сіняга тону і глухіх участкаў сцен, лініі злучэння якіх маюць дыяганальныя ступеньчатыя абрысы. Вышынныя карпусы, якія навісаюць над стылабатамі, абапіраюцца на калоны вышынёй у два ўзроўні. Прастора першых двух паверхаў арганізавана з выкарыстаннем двухсветных атрыумаў, ліхтароў верхняга асвятлення^[2].

Зноскі

1. Современная Беларусь: энциклопедический справочник. В 3 томах. (руск.) / [редколлегия: М. В. Мясникович и др.]. — Мн.: Белорусская наука, 2006—2007.
2. Шамрук, А. С. Архитектура Беларуси ХХ — начала ХХІ в.: эволюция стилей и художественных концепций. — Минск: Белорусская наука, 2007. — 335 с.: илл. ISBN 978-985-08-0868-4