Danae

Danae (Δανάη / Danáê e henc'hresianeg) a oa merc'h da Akrisios, roue Argos, ha da Eurydike. Mamm an haroz Perseüs e oa ivez.

Danae, gant Jan Gossaert (1527)

Danae, gwelet gant al livourez italian Artemisia Gentileschi.

Danae Gustav Klimt (1907). Un tamm mat erotekoc'h eo ar glav amañ.

Ar vojenn

Mantret e oa ar roue Akrisios dre ma n'en doa mab ebet. Goulenn a reas neuze digant un orakl hag un hêr a deuje dezhañ. Hag egile da lavarout dezhañ e vije lazhet gant mab e verc'h. Evel-just ne oa ket troet ar roue da c'hortoz taol ar marv re vuan, ha kraouiañ a reas e verc'h en un tour arem, da virout outi a c'henel mab ebet.

An doue Zeus he c'hare e kuzh avat ha donet a reas un noz en he c'hell e stumm ur glav alaouret (hervez mojennoù all e oa ur bann-heol).

Brazezet e voe ar briñsez gantañ er stumm-se ha genel a reas Perseüs. Droug a oa er roue avat, met n'en doa ket c'hoant da sachañ warnañ kounnar Zeus ma raje droug da vab an doue. Lakaet e voe e verc'h hag e vab-bihan gantañ en un arc'h koad, da ziskouez d'an dud. Goude e voe taolet an arc'h er mor.

Sioulaet e voe ar mor gant Poseidon, war c'houlenn Zeus. Degouezhout a reas mamm ha mab en enez Serifos. Skoazellet e voent gant Diktys, breur ar roue Polydektes, a zesavas Perseüs vihan. Ar roue avat a glaskas he rediañ da zimeziñ gantañ. Perseüs a oa bet e-keit-se o lazhañ Medousa, a oa o tont en-dro gant penn eben. Pa glevas ar c'heloù e troas ar roue e maen hag e tec'has gant e vamm hag int war o c'hiz da Argos.

Diwezhatoc'h, eme Vergilius, ez eas Danae da Italia ma savas kêr Ardea. Un tamm bec'h a savas etre he mab-bihan Turnus hag Aineias da c'houzout piv a zimezje gant Lavinia.

Oberennoù arzel

Mojenn Danae zo bet livet kalzik, hag ar glav aour ivez:

• gant Mabuse (1527, Alte Pinakothek München),
• gant Tizian ez eus meur a livadur:
  • unan e 1545, a zo e mirdi Naplez
• gant Tintoretto
• gant Orazio Gentileschi (war-dro 1621, Museum of Art e Cleveland (Ohio), SUA)
• gant e verc'h, Artemisia Gentileschi (mirdi St. Louis (Missouri), SUA)
• gant Rembrandt (1636, Mirdi ar Peniti)
• gant Giambattista Tiepolo (war-dro 1736, mirdi Stockholm).
• Mademoiselle Lange en Danaé zo ul livadur gant Girodet, livet en 1799 (Institute of arts e Minneapolis). Ennañ e weler ur vaouez yaouank en he noazh o serriñ en ur ouel c'hlas pezhioù aour a weler o kouezhañ eus an neñv. E gwirionez eo ur flemmadenn ouzh ur vaouez displijet gant un oberenn. Gant Girodet e oa bet livet, en 1798, un Danée a zo hiziv er Museum des Bildenden Künsten e Leipzig.
• gant Gustav Klimt eo bet livet ar vojenn en un doare erotekoc'h 1907-1908, ma weler ar glav aour oc'h en me silañ etre div vorzhed pleget ur vaouez en he noazh, ha war he dremm doare goursav an embarañ.

Taolennaoueg

• 
  Danae hag ar glav alaouret, gant Tizian, awenet gant Metamorfozoù Ovidius, ma weler ar plac'h pa zeu ar glav d'he glebiañ.
• 
  Danae hag ar glav aour, livet gant Tintoretto (dibenn ar XVI^vet kantved).
• 
  Rembrandt zo bet awenet ivez gant mojenn Danae.
• 
  Danae gwelet gant al livour italian Orazio Gentileschi.

Pennadoù kenstag

• Taolennoù:
  • Danae hag ar glav alaouret, gant Tizian.
  • Danae, zo ul livadur gant Gustav Klimt.

Liammoù diavaez

Commons

Muioc'h a restroù diwar-benn

Danae

a vo kavet e Wikimedia Commons.

Steredoniezh

• Un asteroidenn zo anvet (61) Danaë.