Kamp Etrekeltiek Ar Vrezhonegerion

Kamp Etrekeltiek Ar Vrezhonegerion (KEAV), krouet e 1952, zo ur gevredigezh hag a ra war-dro aozañ ur skol-hañv^[1] ha stajoù da zeskiñ ha da studial brezhoneg. Komz brezhoneg a-hed an devezhioù eo ar reolenn ret, ken e c’hell ar stajidi ren ar vuhez en ur pleustriñ ar yezh e pep degouezh. An ober pennañ eo ar skol-hañv, enni daou staj sizhun-pad war ur pemzektez gant meur a live e miz Gouere^[2]. Anavezet eo KEAV evel un aozadur-stummañ ez-ofisiel.

Kastellin, miz Gouere 2009 : Strollad ar Vro Bagan o c'hoari evit tud KEAV

Istor

"Sizunieg vrezonek Sant-Wazeg" ha kampoù-hañv war he heul

Savet e voe ur c'hamp-hañv brezhonek e presbital Sant-Wazeg e 1931. Degemeret e voe ar berzhidi gant person ar barrez, an aotrou Gwilhou Saout. Hervez Pêr Denez e kemeras perzh un dousennad tud, en o zouez, Loeiz Andouard, Remont Delaporte, Deneza Guieyesse, Job Gwennegan, Armand Keravel, Yann Gerlann, Frañsez Kervella-Kernu, Célestin Lainé, Robert Le Helloco hag Olier Mordrel, an holl anezho deuet da glask gounid arnodenn ar Simbol. Dont a reas ivez Marc'harid Gourlaouen d'un emvod ma vo divizet dioutañ sevel ur servij kentelioù brezhonek dre lizher gant ar c'hevarzhe da vezañ krouet, Ober e anv, hag e vo savet Skol Ober gantañ. E 1935 e voe dalc'het ur c'hamp-hañv brezhonek e Plougouskant dindan atebeg ofisiel Herberc'hti Yaouankiz Vreizh (Auberges de jeunesse de Bretagne), gant sikour Jermen Breton ha hini Ober. E 1936 ez eas ar gampourien da Lopereg hag, e 1937, 1938 ha 1939, da greizenn-dudi Milin Penfoull, e Loperc'hed, hag eno e teuas Vefa de Bellaing. E 1938 e voe lakaet e plas arnodenn ar Simbol hini an Trec'h, kaset an tremnidi e koad Trewarez, e Sant-Wazeg^[3].

Deroù

Ur c'hamp-hañv hollvrezhonek a voe digoret d'an 3 a viz Eost 1948 e Kleder (Penn-ar-Bed) gant Ronan Huon, Vefa de Bellaing ha Zavier Langleiz. Paol Kalvez en doe kemeret ur perzh bras war an aozañ. Da zigentañ e oa ur c'hamp evit familhoù an Emsav a felle dezhe tremen ur sizhunvezh vakañsoù e brezhoneg penn-da-benn ha degemeret e oa an dud digenvez a-us 17. Lod kaer anezhe n'o deveze ket digarez da glevet kement-se a vrezhoneg a-hed ar bloaz, lod zoken pa ne oant ket o chom e Breizh. Sikour a reas KEAV ar familhoù-se da zerc'hel bev ar yezh a-hed d'ar bloaz.

Displeget eo bet meur a wezh gant Ronan Huon ha Vefa de Bellaing ma oa bet dipitet un toullad a vrezhonegerien deuet e kamp-hañv Bodadeg ar Sonerion, e Sarzhav, e 1947, pa voe graet an obererezhioù e galleg nemetken. Dalc'het e voe un emvod e lec'h Kelc'h keltiek Roazhon e miz Genver 1948, pa ne vije ket bet aotreet un obererezh breizhek eus ar seurt estreget dindan disglavier un aozadur anavezet. Ne voe ket savet ez-fisiel ar c'hevarzhe a-raok 1952.

Skrivet e voe da Yves Berthévas, maer Kleder, ur mignon d'an Emsav hervez komzoù Vefa de Bellaing, a respontas e c'hellfe feurmiñ ar skol publik hag pa erruas muioc'h a 90 den^[4] e voe implijet parzhioù ar skol gatolik ivez. Digoret e voe ar c'hamp e diwezh Gouere, just goude klozadur Gouel ar Bleun-Brug e Kastell-Paol, ken en doe tro pennadurezhioù an Emsav dont da weladenniñ. Aesaet e voe pa ne veze kentelioù war ar brezhoneg diouzh ar beure hepken, ha pourmenadennoù ha diduamantoù a veze graet goude lein

Adalek ar penn-kentañ ez eus bet Kelted tramor (13 diwar 57 stajiad e 1948), Kembreiz peurvuiañ, o kemer perzh er c'hamp, diwar-se e raer "etrekeltiek" anezhañ. Hervez diazezourien KEAV, paneve sikour ar re-se ne vefent ket deuet a-benn da sevel tra pe dra diouzhtu goude an Eil Brezel-bed.

Pennaennoù difiñv

Staliet e voe bet KEAV diwar beder bennaenn ha n'eus ket bet kemm dezho :

1. Brezhoneg a zo ar yezh komzet gant an holl hep n'em harpañ war ar galleg. Implijet e vez yezhoù keltiek all pe reoù all diouzh ezhommoù an eskemmoù
2. N'eus goprad ebet, koulz evit an deskadurezh hag an aozadur war al lec'h, ken e tlee pep stajiad kemer ur perzh e labourioù pemdeziek : naetaerezh, keginañ, leuniañ an asiedoù, derc'hel ar bar, labour melestradurel, hag all…
3. Darn an abadennoù-noz (c'hoariva, kan, sonerezh, dañs) a vez prientet gant ar stajidi harpet gant ar gelennerien. Ar prezegennoù a vez graet evit netra dindan atebeg ar gevredigezh
4. Digor eo da bep brezhoneger ha ne vez ket sellet ouzh e vennozhioù personel. Goulenn a ra an dud o ren ar gevredigezh ma vez diskouezet un doujañs gwir d'ar re all

Kreñnvaet deskadurezh ar yezh

Ouzhpenn kelc'h ar familhoù diazezer e teuas muioc'h-mui a dud hag e voe o fal deskiñ brezhoneg en un doare efedus, da skouer tud enskrivet e Skol Ober pe er c'hentelioù-noz, ken ez eo deuet KEAV da vezañ ur gwir staj yezh komzet ha skrivet, kentoc'h eget ur c'hamp vakañsoù e brezhoneg. Met e teu kalz a familhoù asamblez gant o vugale atav. Rannet eo bet pemzektez ar bloavezhioù kentañ etre div sizhuniad<E bloavezhioù zo tro 2000 eo bet aozet teir sizhuniad.</ref>, met posubl eo dont war an holl prantad.

Er bloavezioù '80 ha '90 e voe levezonet emdroadur ar skol-hañv gant diorroadur an deskadurezh vrezhonek (skolioù Diwan adalek 1977 ha skolioù divyezhek un nebeut bloavezioù goude), pa teue mioc'h-muiañ a vistri-skol pe danvez mistri.

Lec'hioù ar skolioù-hañv =

E-pad pell amzer e veze klasket kemmañ lec'h bep bloaz, Plonevez-Porzhe (1949), Plouenan (1950 ha 1960), Pleheneg (1951) Ploueg-ar-Mor (1952 ha 1956), Plozeved (1953 ha 1958), Porsal (1954), Kledenn-ar-C'hab (1955), Plougouloum (1957), Rostrenenn (1959). Gant an diaes ma oa deuet kavout unan a-feson (abalamour ma oad krog da zihan a lojañ ar vugale er skolioù) e voe dibabet azalek 1977 chom e skolaj Sant-Alan e Skaer. E 1990 ez eas KEAV da skol Joliot-Curie, e Skaer bepred, betek 2007.

E 2008 e rankas KEAV kuitaat Skaer pa ne c'halle ket ar skol eno e zegemer ken, ha dalc'het e voe an div sizhunvezh staj e skol labour-douar an Nivod, e parrez Lopereg. Abaoe 2009 e vez graet e Lise labour-doauar an Aon Kastellin, e-kreiz miz Gouhere.

Ar stajoù

Kastellin, miz Gouere 2009, abadenn-noz

Anavezet eo KEAV da gentañ-penn evit e staj div sizhunvezh a vez dalc'het e miz Gouhere ha ma ne vez komzet nemet brezhoneg. Ur staj "soubañ er yezh" an hini eo eta. Ouzhpenn ar c'hentelioù diwar-benn ar yezh e vez kinniget d'ar stajidi ober a bep sort traoù e brezhoneg : mont da vale, da welet brezhonegerien eus ar c'hornad m'emañ ar staj ha neuze da gontañ gante, sellet ouzh arvestoù (c'hoariva, kontadennoù ha kement zo). Kentelioù zo bremañ hag a vez kinniget evel stalioù-labour : c’hoariva brezhoneg, video, sevel podkastoù, skrivañ hag all.

E-pad ar goañv, diouzh ar bloavezhioù, e vez aozet ur staj un devezh pe zaou evit ar gelennerien pe ar re a zo e-soñj da vont da gelenn.

A-youl-vat eo ar re a labour evit KEAV, na pa vefent kelennerien pe animatourien a bep sort.

Animatourien, kelennerien

Setu un toulladig eus an niver bras a dud o deus bet kemeret perzh : deskadurezh, prezegennoù, melestradurezh, .

Stefan Alliot Anna ar Beg Clyde Belmont Herve ar Bihan Sylvain Botrel Serj ar Bozeg Kristian Brisson

Loig de Châteaubriant Lus Chauveau Cédric Choplin Ronan ar C’hoadig Armelle ar C'hozh Dominig Cotel Nikolaz Davalan Pêr Denez Visant Dubois Loeiza an Duigoù Klaod an Duigoù

Ivon Gag Emile Granville Myriam Guillevic Rhisiart Hincks Ronan Hirrien Gwenael Huon Tudual Huon

Dominig Jolivet Azenor Kallag Riwanon Kallag Pierrette Kermoal Fañch Kerrain Herve Kerrain Mark Kerrain

Jean-Yves Lagadeg Ronan L'Hour Lena Louarn François Louis Tomaz Laquaine Gwenole Larvol

Jérôme Masson Gwenael Maze Martial Menard Guy Peñseg Jean-Do Robin Yann Talbot Erwan Tranvouez Alan Tudored

Kelennerien nevez a vez bep bloaz, ha dibosubl eo menegiñ an holl abaoe 1948.

Kentelioù SADED e K.E.A.V. embannet gant Preder

E deroù ar bloavezhioù 1960, pa veze darempredet KEAV gant izili SADED, a-raok ma voe savet o hini e 1968, e voe embannet kaieroù gant anv KEAV:.

• Kamp etrekeltiek ar vrezhonegerion 1964, (Kentelioù ar Rummad Uhel), Gwenael Maze, Ronan Ar Glew, Erwan Gwegen, Mari Elen Maze, Goulven Pennaod, Loeiz Lemoine, Ivona Konan, 1964.
• Kamp etrekeltiek ar vrezhonegerion 1965, Erwan Gwegen, Goulven Pennaod, Abennez, Olivier Loyer, 1965.
• Kamp etrekeltiek ar vrezhonegerion 1966 (Kentelioù ar Rummad Uhel), Abennez, Mari Elen Maze, Gab Cherel, Ronan Jolais, Gwernegan, Yeun Gourves, Tangi Louarn, 1966.

Pennadoù gant skolidi SADED e K.E.A.V. embannet gant Preder

• Areizh 01 (K.E.A.V. 1967), Bernez An Nail, Pierrette Kermoal, Gireg Konan, Ivona Konan, Gi Kreac'h, Erwan Evenou, Yann-Fañch Furic.
• Areizh 02 (K.E.A.V. 1967), Gwernegan, Ronan Jolais, Line Bourdier, Yeun Gourves, Gwion Ar Menteg.

Liammoù diavaez

• Lec'hienn KEAV
• 1948 Ronan Huon : kentañ skol-hañv KEAV
• 2006 : Le Télégramme, 24/07/2006]
• Gil Penneg, Jean-Jacques Bihan. Kamp Etrekeltiek ar Vrezhonegerien Le Télégramme, 26 Mae 2015

Levrlennadurezh

• Pêr Denez, "Notennoù diwar-benn istor Ober". E-barzh Al Liamm, niv. 65, Du-Kerzu 1956.
• Pêr Denez, "Istor Ober : notennoù klokaat". E-barzh Al Liamm, niv. 66, Genver-C'hwevrer 1957.
• Vefa de Bellaing, '"Le camp des Bretonnants". E-barzh Ar Vro, niv. 10, Mezheven 1961, p. p. 25-33.