From Wikipedia, the free encyclopedia
Сара Бернар (фр. Sarah Bernhardt; Бакъ цӀе Генриетт Розин Бернар, фр. Henriette Rosine Bernard; 1844 шеран 22 октябрь, Париж, Франци — 1923 шеран 26 март, Париж) — французийн актриса йу. XX бӀешо долалуш цунах олура «исторехь массарелла гӀарйалла актриса». Дуьххьара дӀа цуьнан цӀе йагӀара Европехь 1870-гӀу шерашкахь. Цул тӀаьхьа цуьнан гастролеш триумфаца дӀайагӀара Америкехь. Цо дукхахьолехь ловзийра ладаме драматически ролеш.
Сара Бернар | |
---|---|
Sarah Bernhardt | |
Бакъ цӀе | Генриетт Розин Бернар |
ГӀуллакхан тайпа | театральный актёр, киноактёр, танцор, йаздархо, актёр |
Йина терахь | 1844 шеран 23 октябрь[1][2][…] |
Йина меттиг | Париж, Франци |
Кхелхина терахь | 1923 шеран 26 март[3][4][…] (78 шо) |
Кхелхина меттиг | Париж |
Корматалла | актриса |
Гражданалла | Франци |
Да | Edouard Bernhardt[5] |
Нана | Юдифь Бернар |
Бераш | Морис |
СовгӀаташ |
Сийлахь легионан орден |
Сара Бернар Викилармехь |
Сара Бернар йина 1844 шеран 22 октябрехь Парижехь. Цуьна нена цӀе Юдифь (тӀаьхьа Юлия) йара. Юдифь да жуьгти коммивояжер Мориц Барух Бернардт вара, нана Сара Гирш (1797—1876) йара.
1835 шо дуьйна Юдифь а, цуьна йиъ йиша а, ваша а кхиина Сара Кинсберген цӀе йолу дестес (1809—1878). Цуьнан да мила хилла хууш дац. Цхьаболчара цуьна да Поль Морель хилла боху, французан флотан эпсар (цхьадолчу кехаташ тӀехь иштта йаздина ду). Вукхара боху цуьна да къона адвокат Эдуард Бернар хилла.
Франце кхаччалца Юдифьс модистка болхбина, амма Парижехь иза куртизанка хилла. Хаза йухьасибаташ а, кечйала хаар а бахьнехь иза дика йехаш йара хьалдолу божари чоьтех. Цуьнан йоӀ сакъоьруш лела новкъа йара цунна. Цундела Юдифьс иза Ингалсе дӀахьажинера. Хьалакхиалц цигахь йиса мегаш йара Сара. Амма дола да цхьа а уллехь воцуш хенахь иза пешахь йогучу цӀеран дукха улле йагӀанера. Цуьнан кучах цӀе йелира. ТӀе нисбелча лулахойша кӀелхьара йаьккхира иза. Нанас Европера хьаеана шеца Париже дӀайигира Сара. Амма дукха хан йалале йуха а дӀайахара иза, шен йоӀ кхоьчу наьнца а йитина.
ЦӀахь сингаттаме хилара бахьнехь Сара азйеллера, дог аьшна йара. Цхьана динахь охьайожна цо ког а, куьг а кагдира. Таккха нанас иза йуха а ша йолчу дӀайигира.
Сара йазда а, деша а, дагарда а хууш йацара. Иза дӀайелира мадам Фрессардан школе. Цигахь цо шина шарах дийшира. Доьшуш хенахь цо дуьххьара спектаклехь дакъалецира. Школехь цкъа спектакль дӀайодучу хенахь цуьнан нана чуйеара ше йоӀе хьажа. Эццехь холчу хӀоттина Сарина шен роль йицйелира. Цу хенахь дуьйна сценех кхоьруш йусу иза.
1853 шарахь Сара деша дӀало Грандшамп цӀе йолу гӀоли йина долахь йолу школе. Иза цига дӀанисйеш гӀодинарг вара герцог Морни.
Жима йолуш Сара чӀогӀа оза йара, даимма йовхарш йаттара цо. Лоьраш олура иза кестта туберкулез бахьнехь лийра йу. И бахьнехь цунна дагар йалар дӀацадолура.
Цхьана дийнахь Сара «Комеди Франсэз» спектакле йоду. Эццахь цуьнан театрехь болх ба дог-ойла хилира.
Театран киса меллиша хьаладаханчул тӀаьхьа а суна хааделира кхетам а дӀаболуш санна. Ала мегирду, оцу минотехь сан дахаран киса хьаладахара.
13 шо долуш Сара Драмин исбаьхьаллин лаккхара къоман консерватори драмин классе деша йахара. Цига деша йодуш экзамен дӀайала йезара. Экзаменан кечам бан цо дикци урокаш оьцу. Коьрта хьехархо оцу хенахь вара Александ Дюма-да. Цо Ӏамайо Сара озаца а, ишарца а сценин тӀехь амал дӀагайта. Экзаменехь цо массо а цецвоккхий, деша дӀахӀутту. Шен берриг ницкъ цо дешарна дӀало. 1862 шарахь иза дешна йолу. Экзаменехь цо шоллагӀа совгӀат даьккхира.
1862 шеран 1 сентябрехь Сарас коьрта роль ловзийра «Комеди Франсэз» театрехь хилла йолу Жан Расинc йазйина «Ифигения» спектаклехь. Критикаш реза ца хилира цунна. Цуьнан цӀе афишаш тӀера меллаш дӀайера йу моьттара массарна а. Кестта театрехь дов даьлла Сара цигара дӀайелира. Итт шо даьлча бен йугӀа ца еара иза цига.
Театрера дӀайаханчул тӀехьа хала зама еара цуьна. Цул тӀехьа деа шарах лаьцна хууш дукха хӀума дац. 1864 шеран 22 декабрехь цо кӀант вира. Шени, шен кӀантани рицкъ даккха йезаш йолу дела иза балха дӀахутту «Одеон» цӀе йолу театре. Цо левзина масийтта роль хьовсархойша тидам боцуш йитира. ТӀаьххьара критикаш хасти цуьна Кодели роль «Король Лир» спектаклехь. Цул тӀаьхьа хилла «Кин» боху спектакль нахана чогӀа хазахеташ тӀеийцира.
1869 шарахь иза йара Франсуа Коппес йазйина йолчу «ТӀаьхволург» аьлла спекталехь дакъа лоцуш. Гуттар чӀогӀа аьтто белира цуьна 1872 шарахь хилла Виктор Гюгос йазйина «Рюи Блаз» спектаклехь, Зуда-Паччахь роль левзира.
Сарас болхбира «Комеди Франсез», «Жимниз», «Порт-Сен-Мартен», «Одеон» театрашкахь. 1893 шарахь цо ийцира «Ренессанс» боху театр, 1898 шарахь — «Насьон» театр. Оцу театран наха «Сара Бернар театр» аьлла цӀе тиллира.
Станиславскийс олура Сара Бернар кхолларалла ду кхачамалла кеп. Кхоьчу бевзаш болчу заманхоша олура Бернарах похӀма дац. Цуьнан кхиамийн бахьанаш царна гора газеташ иза кхайкхайарехь, цуьна цӀера хӀумнаш дийцарехь.
Цуьнан тоьлла ролеш йара: донья Соль («Эрнани» Гюго), Маргарита Готье («Камелиш йолу зуда» Дюма-кӀант), Теодора (иштта цӀе йолу Сардус йазйина пьеса), принцесса Грёза, герцог Рейхштадтский (иштта цӀе йолу пьесехь а, «Аьрзун кӀорни» а Ростанс йазйина), Гамлет (иштта цӀе йолу Шекспирс йазйина трагеди), Лорензаччо (иштта цӀе йолу Мюссес йазйина пьеса). 1880-гӀа шерашкахь цуьна гастролаш хиллера Европина а, Америкина а дукха пачхьалкхашкахь, Россиехь а (1881, 1892, 1908—1909).
1905 шарахь Рио-де-Жанейро гастролехь йолуш Сарас аьтто ког лазийра. 1915 шарахь и ког дӀабаккха бийзира. Амма цо шен болх ца битира. Хьалхара Дуьненна тӀом болу хенахь иза фронтехь хуьлу спектаклашкахь дакъа лоцуш йара. 1914 шарахь цунна йелира Сийлллийн легион орден. 1922 шарахь цо театр йитира.
Иза йелира Парижехь 1923 шеран 23 мартехь жимашийн цамгар бахьнехь. Лечу хенахь иза йара 78 шо кхаьчна. Пер-Лашез кешнашкахь дӀайоллина Сара Бернар.
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.