TFT LCD

Math o sgrin (neu 'ddangosydd') grisial-hylif yw TFT LCD (thin-film-transistor liquid-crystal display) a ddefnyddir mewn gliniaduron, y set deledu, dyfeisiadau llaw fel y cyfrifiannell, monitorau cyfrifiaduron, ffonau symudol, taflunyddion, satnafs ayb.^[1]

ASUS Eee PC, gliniadur a oedd yn cynnwys y sgrin TFT LCD

Dechreuwyd gwerthu TFTs yn fasnachol yn 1986. Olynodd yr LCD a ddaeth allan yn 1971^{[2] [3]} a rhagflaenodd yr OLED Organic light-emitting diode display a lansiwyd yn 2003.^[4]

Gwneuthuriad

Gosodir yr elfennau (neu gelloedd y sgrin) mewn colofnau a rhesi. Gan y gellir gyrru foltedd yn uniongyrchol i bob cell nid yw'r trydan yn amharu a chelloedd eraill. Cysylltir pob colofn a phob rhes i switsis ar ffurf transistor: un ar gyfer pob cell. Gan mai un ffordd yn unig y gall y cerrynt lifo drwy'r transistor, nid yw'r gwefr a roddir i bob picsel, felly, yn cael ei wagio'n llwyr. Mae pob picsel yn gynhwysydd (capacitor) gyda haen o hylif ynysol rhwng yr haenau.

Diagram sy'n dangos sut y gellir pweru pob elfen unigol o'r sgrin.

Yn wahanol i'r lled-ddargludydd a wneir o silicon grisialaidd, defnyddir haen denau o silicon amorffaidd ar haen o wydr sy'n haws i'w gynhyrchu, ac felly'n rhatach.

Gwneuthurwyr

Ychydig iawn o wneuthurwyr dangosyddion TFT LCD sydd, oherwydd y gost anferthol o godi ffatri pwrpasol. Yn y rhestr ganlynol, nodir y math o ddangosydd mewn cromfachau. Ym mhlith y gwneuthurwyr mae:

• Panasonic (IPS-Pro)
• LG Display (H-IPS & P-IPS)
• Hannstar a Chunghwa Picture Tubes, Ltd. (S-IPS)
• AU Optronics (A-MVA)
• Chi Mei Optoelectronics (S-MVA)
• Samsung/Sony (S-PVA)
• Samsung (AFFS)
• Sharp Corporation (ASV ac MVA)