Subarbaraĵo

La subarbaraĵo ampleksas la plantojn kaj la plantotavolojn sub la arba etaĝo. La ĉeesto de lumo dependas de la kanopeo de la arba stratumo kaj gravas por la disvolviĝ-eblecoj de la subarbaraĵaj plantoj.

Subarbaraĵo kun Ranunculus ficaria en Beith, North Ayrshire ( Skotujo ).

Faka terminologio

En arbaristiko kaj forstumado oni uzas multecon de terminoj por priskribi la stratumojn en arbarero. Laŭ Lexicon silvestre ^[1], distingendas :

• La supra etaĝo : tiu parto de (samaĝa) arbarero, kiu konsistas el la dominantaj arboj kaj formas la plej supran kronetaĝon; ĝi ne apartenas al subarbaraĵo.
• La suba etaĝo : Tiu parto de arbarero, kiu ne partoprenas kun siaj arbokronoj en la kronetaĝo de la dominantaj kaj interetaĝaj arboj; ĝi ne apartenas al subarbaraĵo.
• La suba kreskaĵaro : (Pli junaj) arboj kaj arbedoj, evoluiĝantaj sub la krontegmento.
• La herbotavolo : Tiu plantotavolo (en la arbarero), kiu konsistas el herboj, filikoj kaj nanaj arbustoj.
• La surgrunda flaŭro : Tuto de ĉiuj plantoj - escepte de arboj kaj arbedoj -, kiuj formas certan vegetaĵaran tavolon proksime de la grundo.

Strukturo de la subarbaraĵa vegetaĵaro

Oni povas fari jenan klasifikon por la subarbaraĵo :

Stratumo	Alteco	Ĉeestantaj plantoj	Ekzemploj el la Miksaj atlantikaj arbaroj
Muskotavolo	kelkajn centimetrojn	muskoj kaj fungoj	Sphagnum palustre
Herbotavolo	0 – 0,5 m	arbidoj kaj herboj	arbara braĥipodio
Arbustotavolo	0,5 – 1,5 m	arbustoj	rubuso
Arbedotavolo	1,5 – 8 m	arbedoj	frangolo
Suba kreskaĵaro [2]	> 8 m	junaj kaj etaj arboj	birdokaptista sorbuso, junaj fagoj en kverkaro