Masa molar

Masa molarra substantzia baten masaren eta kantitatearen arteko erlazioa da.^[1] Hau da, substantzia baten mol baten masa da.^[2] Masa molarraren magnitude-sinboloa M da, eta gehienetan g/mol unitateekin adierazten da. Substantziaren araberakoa da, adibidez, sodioaren masa molarra beti 22,990 g/mol da eta urarena batazbeste 18,015 g/mol.

Masa molarrak eta masa molekularrak zenbakizko balio bera dute; ezberdintasun bakarra da masa molekularra masa atomikoaren unitateetan (u) adierazten dela. Masa molarra eta molekularraren arteko konbertsioa egiteko unitateak besterik ez dira aldatu behar. Hau da, fluor (F₂) molekula baten masa 37,997 u bada,^[3] bere masa molarra 37,997 g/mol izango da.

Erabilera

Masa molarra jakitea erabilgarria da substantzia-kantitatea kalkulatzeko. Esaterako, 100 g dituen ur lagin baten substantzia-kantitatea kalkulatzeko uraren masa molarraz zatitu behar da:

${\displaystyle n(\mathrm {H_{2}O} )={\frac {m(\mathrm {H_{2}O} )}{M(\mathrm {H_{2}O} )}}=\mathrm {{\frac {100\ g}{18,\!015\ g/mol}}=5,\!55\ mol\ H_{2}O} }$

Substanzia kantitatea jakiteak gauzaki elementalen kopurua kalkulatzea ere ahalbidetzen digu. Mol bakoitzak zehazki 6,02214076×10^²³ gauzaki elemental dituenez, lagin horretan dagoen ur molekula kopurua da:

${\displaystyle \mathrm {5,\!55\ mol\ H_{2}O\times 6,\!022\,140\,76\times 10^{23}\ molekula/mol=3,\!33\times 10^{24}\ molekula\ H_{2}O} }$

Erreferentziak

1. (Ingelesez) Quantities, units, and symbols in physical chemistry. International Union of Pure and Applied Chemistry, 51 or. ISBN 0-632-03583..
2. (Ingelesez) Young, Paul R.. (2022). Molar mass. Chemistry LibreTexts.
3. (Ingelesez) Fluorine. PubChem.

Kanpo estekak

• Datuak: Q145623