Uppsala

Uppsala (suedieraz /ˈɵpːˈsɑːla/ ahoskatua) Suediako ekialdeko hiria eta izen bereko konderriko (6.989 km²) hiriburua da, Stockholm hiriburuaren ipar-mendebalean. 2010eko erroldaren arabera, 140.454 biztanle ditu eta herrialdeko laugarren hiri handiena da. Suediako unibertsitaterik zaharrena (1477) eta katedralik handiena ditu. Unibertsitateko liburutegia, Carolina Rediviva, Suediako garrantzitsuena da.

Uppsala Uppsala
urban area in Sweden (en)
Irudi gehiago
Administrazioa
Herrialdea	Suedia
Konderria	Uppsalako konderria
Uppland	Probintzia
Izen ofiziala	Uppsala
Jatorrizko izena	Uppsala
Posta kodea	751 70 - 757 59
Geografia
Koordenatuak	59°50′59″N 17°38′20″E
Azalera	48,77 km²
Altitudea	15 m
Demografia
Biztanleria	174.982 (2023ko abenduaren 31)
Dentsitatea	38 bizt/km²
Informazio gehigarria
Telefono aurrizkia	018
Ordu eremua	UTC+01:00 eta UTC+02:00
Hiri senidetuak	Bærum, Craiova, Daejeon, Frederiksberg, Hafnarfjörður, Hämeenlinna, Minneapolis eta Tartu
http://www.uppsala.se/

Geografia

Uppsalako limozko lautada aberatsean kokaturik dago, Fyris ibaiaren ertzean. Ibai hori glaziarrak sorturiko haran bati buruz paralelo da, itsas mailarekiko 30 metroko altueran. Stockholm hiriburutik 70 kilometro ipar-mendebaldera dago, trenez 40 minutu inguru behar dira bertara iristeko.

Klima

Datu klimatikoak (Uppsala)
Hila	Urt	Ots	Mar	Api	Mai	Eka	Uzt	Abu	Ira	Urr	Aza	Abe	Urtekoa
Erregistraturiko tenperatura maximoa (°C)	10.2	11.9	17.4	26.8	32.8	34.5	37.4	34.3	27.8	22.0	14.3	12.4	37.4
Batez besteko tenperatura maximoa (°C)	-1.5	-1.1	2.9	8.6	15.7	20.4	21.4	20.1	15.0	9.6	3.5	0.1	9.4
Batez besteko tenperatura minimoa (°C)	-7.1	-7.4	-4.3	-0.2	4.8	9.5	11.6	10.7	7.1	3.4	-1.3	-5.5	1.8
Pilatutako prezipitazioa (mm)	38	27	29	29	33	44	72	68	59	50	52	44	545
Iturria: Uppsala Universitet[1]

Historia

Gamla Uppsala

Eskandinaviako antzinako hiriburuetako bat izan zen. Hasierako hiria, Gamla Uppsala (Uppsala zaharra), egungoaren iparraldean zegoen, eta politika- eta erlijio-gune garrantzitsua izan zen Bikingoen Aroan. Uppsalako tenplua tenplu pagano bat zen eta historiaurreko garaitik eskandinaviar jainkoak gurtu izan ziren. Horrela beraz kristautasuna sartu aurreko erregeen hilobiak daude bertan. 1164an, ordea, Gamla Uppsala apezpikuaren egoitza bihurtu zen eta aintzinako jainkoak baztertuak izan ziren. Garai hartan gaur egungo Uppsalak Östra Aros izena zuen eta Gamla Uppsalaren itsasportua zen.

Uppsala

1273. urtean sute batek suntsitu zuen antzinako hiria, eta egungoa eraiki zen. Gamla Uppsalako katedrala ere erre zen eta hiri berrian katedrala eraikitakoan, Uppsala berria bihurtu zen apezpikuaren egoitza. Dorreak 118,70 metroko altuera zuen eta Europa iparraldeko eraikin altuena zen, oraindik ere horrela izaten segitzen du.

1477an Uppsalako Unibertsitatea sortu zen, gerora Europako garrantzitsuenetakoa bihurtu zena, bertan lan egin zuen Carolus Linnaeus botanikariari esker besteak beste. XVI. mendean Gustavo I.a Vasa erregeak gaztelua eraikitzeko agindua eman zuen. 1702an sute handi batek hiria erre zuen. Gaztelua bera were oso kaltetua zan zen bai eta katedralaren hainbat zati ere.

Azken urteak

1960ko eta 1970reko hamarkadetan hainbat eraikin historiko behera bota zituzten hiria berrizteko lanetan, haien balioaz konturatu gabe. Gaur egun, sona handiko unibertsitate-hiria da oraindik ere.

Ekonomia

Industriagune garrantzitsua da, mekanika-industria, zerrategiak, zementua, larrugintza dira jarduera ekonomiko nagusiak. Medikuntzari loturiko jarduerak ere baditu.

Ondasun nabarmenak

Hiriaren alde zaharra nahiko trinkoa da baina ibaiak bi zatitan bereizten du, mendebaldean errege familiaren egoitza zena (gaztelua), kleroarena (katedrala) eta auzo akademikoa (unibertistatea) daude eta ekialdean berriz gainerako herri xehea zabaltzen da.

Honako erikin hauek dira aipagarrienak:

• Uppsalako katedrala: XIII. mendeko katedral gotikoa, Europako iparraldeko handiena.
• Uppsalako gaztelua: XVI. mendekoa.
• Uppsalako Unibertsitatea:
  • Eraikin nagusia
  • Carolina Rediviva (liburutegia)
  • Gustavianum (eraikin zaharra)
  • Lorategi botanikoak
• Lineoren lorategia
• Linnaeus Hammarby: Lineoren udako etxea.

Iruditegia

• 
  Uppsalako katedrala.
• 
  Uppsalako gaztelua.
• 
  Artzapezpikuaren jauregia.
• 
  Uppsalako Unibertsitatearen eraikin nagusia.
• 
  Gustavianum.
• 
  Carolina Rediviva.
• 
  Unibertsitateko lorategi botanikoak.
• 
  Lineoren lorategia.
• 
  Linnaeus Hammarby.
• 
  Helga Trefaldighets eliza.
• 
  Fyris ibaia.