Lengoua d’oly

Historicament, la lengoua d’oly, ou tot simplament oly (oïl en francês ; prononciacion francêsa : o-il [ɔ.il], ou-il [u.il], oui [wi], o-ille [ɔj]^[1]), est la lengoua romana que s’est dèvelopâye dedens la partia bise de la Gôla, pués dedens la partia bise de la France, dedens lo mié-jorn de la Bèlg·ica (Bèlg·ica romana) et dedens les iles Angllo-Normandes, et pués qu’ére prègiêe u Moyen Âjo^[2]. Cél groupo de bise at consèrvâ un substrat cèltico més important et pués at endurâ na més granta portâ du gèrmanico que ses suères occitano-romana du mié-jorn, la lengoua d’oc, et galo-romana du sud-èste, la lengoua d’ouè, que los locutors érant més prôchos de Roma.

Cél articllo est ècrit en arpetan supradialèctâl / ORB lârge.

Lengoua d’oly
Temps	Dês lo IXémo siècllo
Lengoues felyes	francês, normand, etc.
Tipologia	accentuâla flèccionâla SVO
Cllassement per famelye
- lengoues endo-eropèènes - lengoues étaliques - lengoues latino-falisques - latin - latin vulguèro - lengoues romanes - lengoues romanes cuchientenches - lengoues galo-romanes - lengoues d’oly
Codes de lengoua
ISO 639-1	--
ISO 639-2	---
Ètendua	endividuèla
Tipo	historica
Glottolog	oila1234
Mapa
Distribucion de la lengoua d’oly en France dedens les petiôtes difèrences de vèrd.
changiér

La lengoua d’oly est pariére a cen qu’apèlont lo viely francês et pués engllobe sos difèrents dialèctos. Dês la fin du Moyen Âjo, lo moyen francês nen èmèye et pués èvolue en francês d’ora, nan pas los ôtros parlars d’oly que réstont du payis et seront la sôrsa des patouès locâls^[3]. L’ensemblo de celos parlars pôt étre considèrâ coment un groupo de les lengoues galo-romanes.

Dètaly de les lengoues

Les lengoues d’oly d’aprés Henriette Walter (1988).

Les lengoues d’oly d’aprés Marie-Rose Simoni-Aurembou (2003).

Les lengoues d’oly pôvont étre rassemblâyes d’aprés des critèros lengouisticos. Dens lo câs de celes prègiêes en France, los regroupâjos pôvont étre fêts avouéc un’endicacion g·eografica, que pèrmèt de localisar lo cârro lengouistico concèrnâ^[4]. Celes lengoues sont,

• u centro (Ila-de-France et son vesenâjo) : francês (solèta lengoua felye du francien)^[5] ;
• u levant : borguegnon-morvandiô, champenouès, lorren ;
• a bise : pecârd, valon ;
• u nord-ouèste : normand^[6] (qu’at balyê nèssènce u francês angllo-normand) ;
• u cuchient : galô, groupo cuchientenc (angevin, torangél, mancél, mayenês, pèrch·eron avouéc) ;
• u sud-èste : franc-comtês^[7] ;
• u sud-ouèste : pouètevin-santongês^{[8],[9],[10],[11],[12],[13],[14]}, doves variètâts (pouètevin, santongês) avouéc ;
• u mié-jorn : bèrrich·on (borbonês avouéc).