Friûl
From Wikipedia, the free encyclopedia
From Wikipedia, the free encyclopedia
Il Friûl (par talian Friuli, par sloven Furlanija, par todesc Friaul) al è une regjon storiche inte bande plui a est des Alps, posizionât inte Italie nort-orientâl e Slovenie ocidentâl. Al dì di vuê e je comprendude te regjons talians Friûl-Vignesie Julie, Venit e te regjon slovene dal Gurizan (Goriška).
 |
«...il Friûl al è un piçul sunt da l'univiers:
alpin, plan e lagunôs in sessante miis di tramontane a misdì...» |
(Ippolito Nievo - Lis confessions di un talian - Capitul Prin) |
Il Friûl al à une culture principâl, chê furlane, ma a son presintis ancje chês taliane, slovene, venite e todescje; a si fevelin furlan, venit, sloven e todesc.
Al è delimitât a nort e nort-ovest des Alps Cjargnelis, a est e nort-est des Alps Juliis, a sud-est dai prins cuei dal Cjars e da la fôs dal Timau, a sud dal Mâr Adriatic e a ovest dae Livence. Si che duncje al cunfine a nort cun la Carintie (sfondare idrografiche de Val Gail), a est cul Cragn, a sud-est cun l'Istrie (che di gjeografie e tache cul Cjars) a ovest cul Venit e a nort-ovest cul Cjadovri.
Chest teritori al è cumò dividût tra lis provinciis talianis di Udin (escludude la Val Cjanâl, carintiane), Gurize, Pordenon, Vignesie (ex Mandament di Puart), Trevîs (comun di Midune) e ta la provincie storiche slovene dal Gurizan (Goriška).
In struc si pues dî che i cunfins istorics-gjeografics dal Friûl coincidedin cun la sume di chei, ben documentâts dilunc dai secui, dal domini di tiere da Republiche di Vignesie clamât Patrie dal Friûl e cun chei da Contee di Gurize e Gardiscje, che in pratiche ricalcavin chei temporâi dal Patriarcjât di Aquilee daspò dal 1420, an de sô division fra venezians e austriacs.
La preistorie e je leade plui o mancul a chê de alte Italie, invezit cirche tal 400 p.d.C. si à il prin acjadiment che al segnarà la storie de tiere: la vignude dai Celts o Gjai Cjargnei. Si trate di popui des monts che nol è ben ciert di dulà che a fossin vignûts. De lôr organizazion politiche e civîl al si sa pôc, ma nus àn lassât cualchi testemoneance: bronzins, cualchi monede cjatade in Plan da Vincule (Cjargne), l'ipogjeu celtic di Cividât, i sufìs dai paîs in -à (-acco) e -ì/-îs (-icco) e diviersis peraulis furlanis come bâr (di barros) broili (di brogilus) grave (di grava) e altris. I Celts a ocuparin lis zonis montuosis dal Friûl, in mût particolâr la Cjargne, che di lôr e cjape il non (Plinio il Vieli clame il teritori abitât dai Gjai Cjargnei Carnorum Regio). Cuant che al vignive il frêt Invier, i Gjai Cjargnei a levin jù te pedemontane cun lis lôr bestiis. La prime date storiche de vignude dai Cjargnei e si à tal 186 p.d.C. cuant che cirche 50.000 di lôr fra oms, feminis e fruts, vignûts jù in planure a fondarin insomp un cuel une vile clamade Akilejia.
Tal 181 p.d.C. i Romans, che a si devin pinsîrs pe grande espansion di chest popul, cuntun grant esercit a sdrumarin la vile, e a ributarin i cjargnei tra lis monts, fondant te Basse une lôr citât che clamarin par l'apont Aquilee. A Aquilee a cjaparin pît dutis lis ativitâts agriculis e artesanâls e la int dal lûc e jentrà a fâ part dal sisteme ministratîf roman. Al nassè il puart di Grau comunicant cun Aquilee e culì e forin metûts la dogane, i magazens, la centrâl di smistament de produzion (soredut vin, vueli, pomis) pal forest e pal dulintor. Si faserin sù grandis stradis di comunicazion viers il centri Italie, il Noric e la Carniule. Lis tieris a forin dividudis cun la centuriazion e dadis in proprietât aes fameis dai soldâts di Rome. Simpri in chest periodi, a vegnivin fondâts e po rinfuarçâts Iulium Carnicum (ven a stâi Zui) e Forum Iulii (ven a stâi Cividât) come basis militârs. In epoche imperiâl Aquilee e deventarà metropoli e capitâl de X regio Venetia et Histria.
Tal 452, cuant che l'imperi roman al jere in plene crisi, al vignì de Panonie Atile che cui siei barbars al fiscà Aquilee che e pierdè gran part da la sô impuartance. Dopo altris invasions di bande di plui popui, tal 489 al rivà Teodorì cul sô esercit di Ostrogots che a restarin in Friûl (e in Italie) par cincuante agns. Tal 568, passant par il pas dal Predil, a rivarin i Langobarts vuidâts di Alboino, che a faserin di Cividât cjâflûc dal Ducât dal Friûl; il patriarcje Paulin I al fuì a Grau puartant cun se i tesaurs de glesie aquileiese. Dopo la conversion dai langobarts al cristianesim e la pâs cun Paulin I la sede dal patriarcjât e fo spostade prime a Cormons e po a Cividât; in chest periodi la citadine logade lunc il Nadison e deventà il plui grant centri dal Friûl, soplantant definitivamentri Aquilee. Grau, però, e restà sot de influence dai Bizantins e dal pape di Rome. Vuê i langobarts a vegnin considerâts di tant di lôr i prins furlans, par il fat che il lôr teritori al comprendeve i cuatri municipis furlans e la la lôr linie di difese e jere plui o mancul chê segne i confins dal Friûl atuâl. Clamât dal pape di Rome, che al viodeve in chest popul une minace par il sô podê temporâl, tal 776 a rivarin te penisule italiche i Francs di Carli, che a terminarin i doi secui di dominazion langobarde e si fermarin te nestre regjon par cent agns. Tra il 899 e il 952 i Ongjars cun lis lôr invasions a dispopolarin il Friûl, mentri planc a plan e scomençà a cjapâ pît la sovranitât religjose e politiche dai patriarcjis.
Ai 3 di Avrîl dal 1077 l'imperadôr Indrì IV al concedè in aministrazion feudatarie il Friûl al patriarcje di Aquilee Sigjeart; e nassè il Principât eclesiastic di Aquilee, un libar feut in cui il rapuart vasalatic beneficiari al ere dret regolât insiemit al imperadôr. Il Principât Patriarcjâl al fò governât prin di vescui ghibelins, todescs, e po di vescui vuelfs, talians e al durà par 343 agns fin al 1420, cuant che la Republiche di Vignesie e invadè il Friûl par slontanâ il cunfin tra la citât e l'Imperi. A guviernâ il Friûl e jere la figure dal lutignint venit, che al cjapà il Cjistiel di Udin, lassant al patriarcje dome il podê religjôs e la rendite des vilis di Aquilee, Sant Denêl e Sant Vît. Intant, tal 1500, al murì cence fiolance l'ultin cont di Gurize, Lenart, e cussì la contee di Gurize e Gardiscje e fo invadude dai austriacs; di chest moment il Friûl al restarà dividût in dôs bandis: ae çampe dal Judri sot la jurisdizion di Vignesie, di chê altre bande sot chê dai Asburcs. Dopo la cuncuiste di Vignesie e si spandarà il non di Patrie dal Friûl.
Lis concuistis napoleonichis a segnarin la fin de Serenissime; daspò di vê batût la Austrie Napoleon al ocupà il Friûl, ma dopo dome sîs mês lu cedè une altre volte ai Asburcs cul tratât di Cjampfuarmit. Tal 1805 però la Piçule Patrie e passà di gnûf ai francês, che a puartarin diviersis riformis socialis. Cuant che Napoleon al fo batût, il Friûl Ocidentâl e Centrâl al passà a fâ part dal Lombart-Venit, chel Orientâl al restà sot il domini diret da la Austrie.
Ancje in Friûl, tant che in ducj i teritoris talians ancjemò in man dai austriacs, a nasserin moviments irredentiscj che a puartarin diviersis voltis a riviei cuintri i parons austriacs. Tal 1848 a sucet une insuresion vuidade da Cavedalis, Duodo e Antonio Caimo Dragoni president dal Comitat provisori; la difese e fo sigurade des fortecis di Osôf e Palme, cheste comandade da Zucchi. Tal 1864 al è il tentatîf di insurezion vuidât di Antonio Andreuzzi un miedi garibaldin. Cul 1866, dopo la tierce vuere di indipendence, il Friûl Ocidentâl e Centrâl al jentrà a fâ part dal Ream di Italie, intant che il Friûl Orientâl al restà part da Austrie-Ongjarie fin al 1918. Dopo il 1866 e scomence a svilupâsi la economie dal Friûl, che e jere une zone depresse e spopolade za de colade di Rome. Durant il fassism e ven creade la citât di Tor di Zuin, ae vanguardie pe chimiche e a ven fate le bonifiche integrâl de Basse.
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.
