冕服
From Wikipedia, the free encyclopedia
Remove ads
冕服係古時間代表得至高禮制嗰衣着體系，係皇帝嘚祭拜天地、宗廟、正旦、聖節等禮祀活動裏頭著嗰衣裳。完套嗰冕服主要含得冕冠、衣裳（上衣、中衣、下裳）、袴、襪、舄、腰帶（革帶、大帶）、蔽膝、佩玉、綬、劍、圭等構件。冕服嗰「形制」依得佢俚嗰款式、色氣、大細，拕分成不同等級，形成國家嗰正式典章制度，箇就係「以禮為服制」。[1]
構造組件
- 冕冠
- 延
- 旒
- 帽卷
- 玉笄
- 武
- 纓
- 充耳
- 天河帶
- 衣裳
- 交領右衽
- 袖
- 袂
- 大帶
- 革帶
- 蔽膝
- 紋章：日、月、星、山、龍、華蟲、宗彝、藻、火、粉米、黼、黻
- 赤舄
製衣流程
冕服係搦玄、纁色繒做嗰，祭服嗰做法係染絲起，接得織造繒。九職之嬪府會加工正絲，舞正嗰「素絲」拕擺嘚「典絲」許首。經過巾荒氏嗰練絲，素絲拕搦得染人上色，佢俚一般揀熱天嗰時間利用草類染料染色，話係丹秫染液嗰效果上佳。等得冷天，絲拕搦還典絲，內外工接過素絲或彩絲開始織造冕服嗰布匹。質量上乘嗰玄纁繒經「典婦功」嗰手，拕搦得縫人，佢俚做正衣裳後再搦還典婦功。末後畫繢嗰畫工、繡工接手，嘚衣裳上繪製五色嗰十二文章。做正嗰冕服成衣拕弆嘚內府，司服會依得場合決定皇帝着衣嗰規格，佢搦冕服交把女御，由女御奉承天子。
形成演變
三代
中國嗰衣飾史歷史非常長遠。《易經》話「黃帝堯舜，垂衣裳而天下治，蓋取諸乾坤。」「黃帝始去皮衣，為上衣以象天，為下裳以象地。」箇下尋到嗰實物也證明許時間嗰華夏人具備做衣嗰能力，好似河南滎陽尋到哩5500年前嗰麻布同得淡絳色羅、紗、紈等帶色帶花嗰實物。等得夏禹，《論語》話佢「惡衣服，而致美乎黻冕」，即大禹不計算自簡嗰衣裳而着重公家嗰服制。商朝係有確切文字記載嗰朝代。《尚書》話「伊尹以冕服奉嗣王歸於亳」，等同證明冕服嗰確實存在。甲骨文裏頭也拕發現有「冕」字，係殷王嗰自稱。[2]
周朝係冕服正式確立嗰時代，後世話「尊古禮」都係意圖去還周朝嗰典章制度。《周禮·司服》搦冕服分做六款（大裘冕、袞冕、鷩冕、毳冕、絺冕、玄冕），故係叫「六冕」。著得正冕服嗰有天子、公、侯、伯、子、男、孤、卿、大夫。各級人員嘚重大祭祀場合，好似祭拜先王、宗廟嗰時間，得着自簡所屬級別嗰最高級別嗰冕服。
秦漢
「自秦滅棄禮法，先王之制靡敝不存，漢初猶服袀玄以從大祀。歷代雖漸復古，終亦不純也。」[3]周朝嗰禮制經過春秋戰國嗰禮崩樂壞、秦朝嗰尊法抑儒，幾乎冇盈幾多哩。秦始皇廢吥六冕之制，光着玄衣紺裳，「一具而已」。[4]玄色係緅色、緇色之間通過六染得到嗰赤黑色，紺色係帶麻麻子紅嗰烏色，佢俚象徵得天，係古人最推崇嗰色氣。
漢朝建立後，復古思想回潮。高祖劉邦即位後冇下子就頒佈《天子所服第八》，「令群臣議天子所服，以安治天下」。[5]賈誼也話「奇服文章，以等上下而差貴賤」。公元59年，漢明帝確立漢朝全面嗰冕冠制度。「天子、三公、九卿、特進侯、侍祠侯，祀天地明堂，皆冠旒冕，衣裳玄上纁下。乘輿備文，日月星辰十二章，三公、諸侯用山龍九章，九卿以下用華蟲七章，皆備五采，大佩，赤舄絇履，以承大祭。」[6]即箇時間嗰完套冕服含得冕冠、玄衣纁裳、赤舄絢履、佩玉、佩刀佩雙印、綬等內容。
唐宋
唐朝恢復過周朝嗰六冕制度，皇帝嗰服制規格甚至拕舞得更繁複，《舊唐書》記載「天子衣服，有大裘之冕、袞冕、鷩冕、毳冕、繡冕、玄冕、通天冠、武弁、黑介幘、白紗帽、平巾幘、白帢，凡十二等。」《新唐書》哈添至十四等。[7]至於禮冠方面，唐朝皇帝一了哩戴通天冠，大祭司嗰時間才戴冕冠。
經過五代嗰亂世，宋朝力圖復還正統禮制，規定「大裘冕無旒，廣八寸，長一尺六寸，前圜後方，前低寸二分，玄表朱裏，以繒為之。玉笄以朱組為紘，玉瑱以玄紞垂之。為裘以黑羔皮，領袖以黑繒，纁裳朱紘而無章飾。佩白玉，玄組綬。革帶，博二寸，玉鈎，以佩紘屬之。素帶，朱裏，絳純其外，上朱下綠。白紗中單，皂領，青褾、襈、裾。朱襪，赤舄，黑絇、繶、純。」[8]末後冕服變得更假華麗，「王洙奏：『天子法服，冕旒形度重大，華飾稍繁，願集禮官參定。』詔禮院詳典禮上聞，而禮院繪圖以進。因敕禦藥院更造，其後，冕服稍增侈如故。」宋朝對冕服嗰爭論故係有時間得持續幾十年不斷。
元明清
蒙元以來，皇室一頭推行漢法，一頭維持蒙古作風，「隨時損益，兼存國制」。[9]冕服拕限定為皇室專用，含得冕冠十二旒、青羅袞龍服、緋羅裳、白紗中單、緋羅蔽膝、玉佩、大帶、綬、襪、履、靴、真圭等內容。元朝起，冕服開始使用一種叫「納石失」（nasij）嗰技法，即「織金錦」。
1368年，明太祖朱元璋覺得五冕制度複雜傷哩，光揀出袞冕做為各類祭祀活動嗰正服。但明朝嗰冕服嗰上衣要莽過早以嗰規格，佢甚至遮得下裳，故係「今衣八章，裳四章，故衣常掩裳」。完套冕服嗰定製係：
- 衣、玄色。凡織六章。曰月在肩。各徑五寸。星山在後。龍、華蟲在兩袖。長不掩裳之六章。
- 裳、黃色。為幅七。前三幅。後四幅。連屬如帷。凡繡六章。分作四行。火、宗彝、藻、為二行。米、黼、黻、為二行。
- 中單、素紗為之。青緣領、織黻文十二蔽膝、隨裳色、羅為之。上繡龍一、下繡火三、繫於革帶。
- 大帶、素表朱裏。上緣以朱。下以綠。不用錦。
- 革帶、前用玉、其後無玉、以佩綬繫而掩之。
- 圭、白玉為之。長尺二寸。剡其上。下以黃綺約之。上刻山形四。盛以黃綺囊。藉以黃錦。
清朝係中國歷史裏頭唯一一隻徹底廢棄冕服制度嗰朝代。有人勸乾隆著漢衫，乾隆反得話：「我朝滿洲先正之遺風，自當永遠遵循」，下諭「衣冠必不可輕言改易，所願變葉子孫，深維根本之計，毋為流言所惑，永永恪遵朕訓，庶幾不為獲罪祖宗之認。」不過，乾隆「取其文，不必取其式」，接受哩冕服制度嗰十二章形式。北京故宮哈留得順治皇帝嗰十二章龍袍。[10]
中華帝國
1915年12月12日，袁世凱建立中華帝國，恢復帝制。佢登基時間穿着嗰祭冠、祭服時常拕話係冕服制度嗰再生。但佢嗰衣裳實際係爵弁同得冕服嗰混合體，衣裳嗰用色、文章才係冕服嗰繼續。
Remove ads
等級差異
冕服會依得不同嗰場合有不共樣嗰等級差異，主要體現嘚冕冠上「旒」數量、長度，衣裳上嗰「章紋」嗰種類、隻數等內容。箇就搦冕服分做六級：
- 大裘冕：王祀昊天上帝所用，配十二旒冕冠，大裘、玄衣纁裳。上衣繪日、月、星辰、山、龍、華蟲六章紋，下裳綉藻、火、粉米、宗彝、黼、黻六章紋，統共十二章，故係叫「十二章服」。
- 袞冕：王之吉服，配九旒冕冠，玄衣纁裳，衣繪龍、山、華蟲、火、宗彝五章紋，裳綉藻、粉米、黼、黻四章紋，統共九章。
- 鷩冕：王祭先公、饗射所用，配七旒冕冠、玄衣纁裳，衣繪華蟲、火、宗彝三章紋，裳綉藻、粉米、黼、黻四章紋，統共七章。
- 毳冕：王祀四望山川所用，配五旒冕冠、玄衣纁裳，衣繪宗彝、藻、粉米三章紋，裳綉黼、黻二章紋，統共五章。
- 絺冕：王祭社稷、先王所用，配四旒冕冠、玄衣纁裳，衣綉粉米一章紋，裳綉黼、黻二章紋。
- 玄冕：王祭群小即祀林澤墳衍四方百物時所用，配三旒冕冠、玄衣纁裳，衣無章紋，裳綉黻一章紋。
《周禮·春官·司服》話明不同等級嗰用處：「王之吉服：祀昊天上帝，則服大裘而冕；祀五帝亦如之；享先王則袞冕；享先公饗射則鷩冕；祀四望山川則毳冕；祭社稷五祀則希冕；祭小祀則玄冕。」不同等級嗰人也有級別嗰限制：「公之服，自袞冕而下如王之服；侯伯之服，自鷩冕而下如公之服；子男之服，自毳冕而下如侯伯之服；孤之服，自希冕而下如子男之服；卿大夫之服，自玄冕而下如孤之服。」
大裘冕
大裘冕係六冕制度裏頭至尊貴嗰衣裳，一般係搦材質上乘嗰黑羊羔皮做嗰。大裘揀烏色，係因為「取其與冕服玄衣相承」；[11]用羔皮，係因為羔羊「跪乳馴順」、「群而不失其類」。[12]
裘衣又拕分做好幾隻級別。依得穿着場合、人員身份、衣裳用途做工，裘衣拕分做大裘、良裘、功裘、廞裘四款。做為裘衣裏頭嗰至高等級，大裘光係做為天子祭天嗰時間著嗰祭服。《司裘》話「裘言大者，以其祭天地之服，故以大言之，非謂裘體侈大，則義同於大射也。」古時間諸侯不得祭天，天子不得搦大裘賞賜把諸侯。[13]
《禮記·玉藻》話「服之裘也，充美也」。大裘嗰外首得着裼衣，即「裼，謂裘上又加衣也」。[14]古人覺得文身盈充才克氣。有身份嗰人走門嗰時間不得光穿裘衣，故係《玉藻》話「表裘不入公門」。裼衣嗰外首哈有上衣，「與裘同色」，「當以袞龍十二章為襲」。[15]
十二文章
《周禮》：「青與赤謂之文，赤與白謂之章。」「文」係不同色氣嗰顏色交錯嘚一起，「章」係顏色好艷嗰紋樣。「文章」拕話嘚一起可以追溯到《左傳》嗰「昭文章，明貴賤」，《楚辭》嗰「青黃雜糅，文章爛兮」。冕服上頭嗰文章係為得標明階級之間嗰等差，好似董仲舒話：「是以天下見其服而知貴賤，望其章而知勢位」。天子穿戴嗰係十二旒、十二章，「十二」係古人思想裏頭嗰至大之數。《尚書》就記載舜嗰時間，「予欲觀古人之象，日、月、星辰、山、龍、華蟲、作會、宗彝、藻、火、粉米、黼、黻、絺繡，以五采彰施於五色，作服，汝明。」
十二文章嗰排列分佈最早得到《隋書》裏頭尋到跡，「具依此，於左右髆上為日月各一，當後領下而為星辰，又山、龍九物，各重行十二。」末後歷代嗰記載着逐漸豐富，但各自有滴子不同。明朝嗰時間，十二文章嗰排列最終確定完備。1405年，永樂皇帝朱棣規定「玄衣八章，日、月、龍在肩，星辰、山在背，火、華蟲、宗彝在袖；纁裳四章，織藻、粉米、黼、黻各二。」
Remove ads
文化意蘊
冕服制度嗰奠定係華夏人中央集權社會嗰象徵。各自利益集團形成差別等級、階層，承認自簡所屬嗰價值地位。天子通過箇隻等級秩序統治四方，佢嗰服飾搦佢同得別嗰社會人群區分開，係下底人不得僭越嗰規章。冕服係王公貴胄嗰專有服飾，不同等級嗰貴族又拕配以不共樣嗰冕服，皇帝也揸得出席場合嗰不同穿着相配嗰冕服。故係《後漢書》話：
夫禮服之興也，所以報功章德，尊仁尚賢。故禮尊尊貴貴，不得相逾，所以為禮也，非其人不得服其服，所以順禮也。順則上下有序，德薄者退，德盛者縟。故聖人處乎天子之位，服玉藻邃延，日月升龍，山車金根飾，黃屋左纛，所以副其德，章其功也。賢仁佐聖，封國受民，黼黻文綉，降龍路車，所以顯其仁，光其能也。
國外影響
中國嗰皇帝早以會贈與冕服把外藩國王，為得顯示係真龍天子，得統帥四方。好似朝鮮古書《高麗史》等史籍裏頭，記載得1065年到1370年之間，高麗國王、世子獲賜好幾到遼國嗰冕服。李氏朝鮮嗰時間，朝鮮嗰冕服等級拕明朝確立為國王著九章冕服，即：「上衣青色，裝飾五章，龍在兩肩，山在背部，火、華蟲和宗彜在兩袖，此三章每袖自上而下各三；下裳纁色，裝飾四章，藻、粉米、黼、黻，每章各二」，另有大帶、蔽膝、佩、綬等配件；王世子著七章冕服。20世紀初年朝鮮自立稱帝，故係改做最高等級嗰十二章冕服。
日本拕唐朝嗰影響至深，早到701年嗰時間，文武天皇就發布大寶律令，規定天皇嘚正式場合得採用十二章冕服嗰「袞龍御衣」。732年，冕服拕正式指定做皇帝至高禮服，佢嗰上衣含得日、月、七星、山、火、龍、華蟲八隻模樣，下裳含得藻、粉米、斧、黻四隻模樣。
越南嗰阮朝時間，脫離中國影響建立帝國，皇帝嗰禮服體制也跟得改做至高級別嗰冕服。
Remove ads
內文註腳
參考書目
外部鏈接
Wikiwand - on
Seamless Wikipedia browsing. On steroids.
Remove ads