Alvito de Mondoñedo

Alvito de Mondoñedo, nado en Mondoñedo despois do ano 1000 e finado en Sevilla no 1063, foi un bispo de orixe galega pertencente á primitiva casa de Saavedra, pois era tataraneto de Adosinda Guterrez, (irmá de san Rosendo) e de Aloito Lucio de Saavedra (910).

Alvito de Mondoñedo

Biografía
Nacemento	Mondoñedo, España
Morte	5 de setembro de 1063 Ishbiliya (Taifa de Sevilla)
Bispo de León
maio de 1057 – 5 de setembro de 1063 – Arias Gundesíndiz → Diocese: diocese de León
Abade
Datos persoais
Relixión	Catolicismo
Actividade
Ocupación	sacerdote católico latino, bispo católico
Orde relixiosa	Orde de San Bieito

Traxectoria

Foi fillo de Aloito Fernández de Saavedra, que foi ricohome e mordomo maior do rei Vermudo II, e de Urraca López de Lemos; o seu irmán máis vello Arias Aloitiz herdou os estados do seu pai, que incluían o castelo de Arias e o territorio de Parga, Vilalba e Mondoñedo.^[1][2]

Algúns autores menciónano como confesor do rei Fernando I de León,^[3] monxe e abade abade de Sahagún^[4][5][6] ou do de Samos,^[7][8] quizais confundíndoo con outro prelado do mesmo nome.^[9] Consta a súa presenza á fronte da diocese en varios documentos dende maio do ano 1057, despois da renuncia do seu antecesor Cipriano.^[10][11]

No ano 1063, o rei Fernando organizou unha expedición contra as taifas do sur peninsular, e tras os seus éxitos militares enviou a Sevilla a Albito e ao bispo de Astorga Ordoño coa misión de recuperar o corpo de Santa Xusta; non conseguiron atopar os restos desta, mais si os de Santo Isidoro, quen revelándose a Albito comunicoulle o lugar da súa sepultura, anunciándolle tamén a súa próxima morte. Efectivamente, o bispo morreu unha semana despois de atopar o sepulcro do santo, e Ordoño regresou a León cos corpos de ambos.^[12]

En presenza do abade de Silos San Domingos, Santo Isidoro foi depositado na igrexa de San Xoán e Albito na igrexa de Santa María de Regla;^[13] segundo a tradición, antes de que Albito fose sepultado, Santo Isidoro apareceuse ao rei Fernando reclamando que o seu corpo estivese presente no enterro do de Albito, como finalmente se fixo.^[14]

Aínda que non foi canonizado nin tivo rezo oficial, foi venerado como santo na igrexa de León. No santoral español aparece o 5 de setembro^[15] ou o 8 de novembro.^[16]