Annette Meakin

Annette Mary Budgett Meakin, nada en Bristol o 12 de agosto de 1867^[1] e finada en Chipping Ongar (Essex) o 26 de xullo de 1959, foi unha escritora inglesa de libros de viaxes.

Annette Meakin

Biografía
Nacemento	12 de agosto de 1867 Clifton, Reino Unido (en)
Morte	26 de xullo de 1959 (91 anos) Chipping Ongar, Reino Unido (en)
Educación	Royal College of Music Stern Conservatory (en) University College de Londres
Actividade
Ocupación	escritora de viaxes
Obra
Arquivos en	Bodleian Library [ CMD ID 8977]
Familia
Irmáns	James Edward Budgett-Meakin Ethilda Budgett-Meakin Herford
Premios
Fellow of the Royal Anthropological Institute of Great Britain and Ireland (en)

Traxectoria

Foi filla de Edward Ebenezer Meakin e Sarah Budgett. O seu pai traballaba nunha plantación de té en Almora, na India.^[2] Foi á escola en Inglaterra e Alemaña. Estudou música no Royal College of Music de Kensington e no Stern Conservatoire de Berlín, e estivo na University College London.^[3] Durante a primeira guerra mundial traballou como asistente de química.^[4]

Ela e a súa nai foron as primeiras mulleres inglesas en viaxar ao Xapón no ferrocarril Transiberiano. Saíron de Londres en xaneiro de 1900 e chegaron a Rusia o 21 de maio logo de parar un tempo en París. Escribiu un texto sobre a viaxe, publicado ao ano seguinte. No libro, A Ribbon of Iron^[5], relata tamén as súas paradas en Omsk, Tomsk, Krasnoyarsk e unha ruta polo río Ienisei, que desemboca no océano Ártico.^[4] A obra aparece citada con frecuencia no libro de Harmon Tupper To the Great Ocean - Siberia and the Trans-Siberian Railway (1965).

En 1921 demandou por plaxio á autora Catherine Gasquoine Hartley, quen en 1912 publicara The Story of Santiago de Compostela. O texto tiña moitas similitudes co libro de Meakin Galicia, the Switzerland of Spain (1909). Como parte do acordo, o libro de Hartley foi retirado das bibliotecas.^[6]

A autora doou os seus fondos á Bodleian Library, da Universidade de Oxford^[7]

Obra

• A Ribbon Of Iron (1901)
• In Russian Turkestan: A Garden of Asia (1903)
• Russia Travels and Studies (1906)
• Woman In Transition (1907)
• Galicia, The Switzerland Of Spain (1909)^[8]
• Hannah More (1911)
• What America Is Doing, Letters From The New World (1911)^[9]
• Enlistment Or Conscription? (1914)
• Nausikaa (1926/1938)
• Polyeuctes (1929)
• Goethe and Schiller: 1785-1805 The Story of a Friendship (1932, 3 volumes)