Fento fero

O fento fero^[1] ou formalmente blechno (Blechnum spicant) é unha especie de fento da familia Blechnaceae. Existen dúas variedades deste fento en Galiza. Blechnum spicant subsp. spicant, que é a máis estendida e de frondes estériles e fértiles moi diferenciados; e a Blechnum spicant subsp. homophyllum , cuxos frondes estériles e fértiles son máis semellantes e dun tamaño menor a 20 cm. Esta última variedade esténdese dende as serra do Xurés e o Baixo Miño até o Eume.

Fento fero
Fento fero (Blechnum spicant)
Estado de conservación
Case ameazada
Clasificación científica
Reino: Plantae División: Pteridophyta Clase: Pteridopsida Orde: Athyriales Familia: Blechnaceae Subfamilia: Blechnoideae Xénero: Blechnum Especie: B. spicant
Nome binomial
'Blechnum spicant' (L.) Sm.

Descrición

Os fentos presentan alternancia de xeracións, isto quere dicir que no mesmo ciclo de vida pasan por dúas formas, a que produce esporas, chamadas esporófitos, e as que producen gametos, chamadas gametófitos. A xeración que vemos nesta especie é a do esporófito, pois o gametófito é moi miúdo. O esporófito está composto dunha fronde formada por un pecíolo e unha lámina. A lámina pode estar unha ou varias veces dividida. Cada división chámase pinna e as divisións das pinnas chámanse pínnulas.

Fento perenne rizomatoso, con rizoma oblicuo ou erecto cuberto de escamas. Frondes de 15–50 cm persistentes formando fascículos, coma xa dixemos, de dous tipos, fértiles e estériles, con pecíolo moito máis curto ca o limbo unha vez pinnadamente dividido (pinnatífido); os estériles (trofófilos) con divisións (pinnas) oblongas ou linear-oblongas, subagudas; as fértiles (esporófilos) con pinnas máis estreitas, lineares. Esporanxios reunidos en grupos (soros), dispostos en liña a ambos os dous lados do nervio principal das pinnas das frondes fértiles, cubrindo practicamente todo o envés das mesmas, producindo un só tipo de esporas (isospóreos) cubertos dunha membrana linear (indusio) ben desenvolvida.^[2]

Distribución e hábitat

Eurosiberiano. Bosques de ribeira húmidos e sombrizos. Noiros e cavorcos lamacentos máis ou menos umbros. Bota as esporas dende a primavera até fins do verán. É moi común nos regueiros e ríos en toda Galiza, en zonas húmidas até os 2.000 m. No verán é moi común.

Taxonomía

Blechnum spicant foi descrita por (Carl von Linné) Sm. e publicado en Mémoires de l'Academie Royale des Sciences 5: 411. 1793.^[3]

Outros nomes galegos

Felgo fero, fento pente, fenta (cómpre non confundir coa especie Athyrium filix-femina).

Sinonimia

• Acrostichum spicant (L.) Willd.
• Asplenium spicant Bernh.
• Blechnum spicant var. elongata B. Boivin
• Lomaria spicant (L.) Desv.
• Lomaria spicant var. elongata Hook.
• Lomaria spicant f. serrulatum Clute
• Onoclea spicant Hoffm.
• Osmunda spicant L. basónimo
• Struthiopteris spicant (L.) F.W. Weiss^[4]