Ferreñas (instrumento musical)

As ferreñas ou ferriñas, son un instrumento musical de percusión formado por un soporte de madeira e pequenos discos de metal (ferreñas). Os discos agrúpanse por parellas e soan, batendo uns contra os outros, cando se axita o instrumento.^[1] Cando o soporte é rectangular, o instrumento recibe tamén o nome de sistro.^[2]

Ferreñas (instrumento musical)
Subclase de	idiófono
[ Wikidata ] [ C:Commons ]

Características

Ferreñas rectangulares (sistro).

As ferreñas máis habituais teñen marcos de madeira circular, cunha aparencia idéntica á das pandeiretas mais sen o parche de pel. Inicialmente, as ferreñas tocábanse na compaña do pandeiro, cuxo son grave complementaban cos seus agudos metálicos.^[3] Os tocadores de ferreñas, sentados, facíanas soar termando delas coa man dereita e batendo ritmicamente entre a man esquerda e a perna. O xeito característico galego de tocar a pandeireta, percutindo con ela sobre a man esquerda, explícase como unha evolución desta maneira de tocar coas ferreñas.^[4]

As ferreñas desapareceron da música popular a finais do século XIX, sendo substituídas pola pandeireta. Un instrumento que unificaba os sons de ferreñas e pandeiro, e que propiciou tamén o declive na popularidade deste último.^[5]