Hinode

Hinode, previamente coñecido como SOLAR B, é un observatorio espacial da axencia xaponesa ISAS (agora reconvertida na JAXA) lanzado o 22 de setembro de 2006 mediante un foguete M-5 desde o Centro Espacial de Uchinoura xunto con outros satélites, como o Hitsat.^[2][5][6]

Hinode / SOLAR B
Representación artística de Hinode.
Tipo	Científico
Organización	ISAS
Data de lanzamento	22 de setembro de 2006, 21:36 GMT[1][2][3][4]
Foguete portador	M-5[2][5]
Sitio de lanzamento	Centro Espacial de Uchinoura[2][6]
Obxectivo da misión	Observación solar non visible, ultravioleta e raios X.[2][6]
NSSDC ID	2006-041A
Masa	700,0 kg[2][5][6]
Potencia	500 vatios[2]
Datos orbitais
Semieixo maior	7061 km[1]
Inclinación	98,1 graos
Apoapse	701,9 km[1]
Periapse	678,3 km[1]
v c e

Características

Hinode é un observatorio espacial xaponés con colaboración internacional e sucesora da misión Yohkoh (SOLAR A). A misión do observatorio é realizar estudos do Sol no rango óptico, ultravioleta e de raios X co obxectivo de desvelar os mecanismos da interacción entre o campo magnético solar e a súa atmosfera ionizada a alta temperatura para facilitar a comprensión da variabilidades solar.^[2][5]

Hinode ten resolución de abondo para medir o vector do campo magnético a escalas dos tubos de fluxo solares, podendo relacionar os cambios de estado magnético cos sucesos coronais e as erupcións solares.^[2][5]

Hinode foi inxectado nunha órbita inicial heliosincrónica de 686 km de apoxeo e 280 km de perixeo, cunha inclinación orbital de 98,3 graos e un período de 105 minutos.^[1][3][6]

Experimentos

A superficie do Sol observada por Hinode.

• Telescopio de raios X: pode observar a coroa (con temperaturas de 500.000 a 10 millóns de Kelvin) cunha resolución de 1 segundo de arco.
• Cámara espectrómetro do ultravioleta extremo: mide a velocidade e outros parámetros do plasma da coroa e da rexión de transición para correlacionar o comportamento dinámico da coroa (medido polo telescopio de raios X) co campo magnético fotosférico (medido polo telescopio óptico).
• Telescopio óptico: mide o campo magnético fotosférico.