Mandril

O mandril^[3] (Mandrillus sphinx) é un primate da familia Cercopithecidae,^[4] relacionado co babuíno e máis estreitamente co dril. O seu hábitat natural atópase no Camerún, Gabón, Guinea Ecuatorial e a República do Congo. Os mandrís viven principalmente na selva tropical e nas zonas de confluencia coa sabana. Teñen unha dieta omnívora que se compón de froitas e insectos. A súa época de apareamento ten lugar dende xuño ata outubro.

Mandril
Estado de conservación
Vulnerable[1]
Clasificación científica
Reino: Animalia Filo: Chordata Clase: Mammalia Orde: Primates Familia: Cercopithecidae Xénero: Mandrillus Especie: M. sphinx
Nome binomial
'Mandrillus sphinx' (Linnaeus, 1758)[2]
Distribución do mandril Distribución do mandril

Tanto o mandril coma o dril foron outrora clasificados como babuínos dentro do xénero Papio, pero investigacións recentes determinaron que deberían ser separados no seu propio xénero, Mandrillus.^[4] Charles Darwin escribiu en The Descent of Man que "ningún outro membro da clase dos mamíferos está coloreado dun xeito tan extraordinario coma o está o adulto macho de mandril."^[5] A especie está clasificada como vulnerable pola IUCN.