País Leonés

O País Leonés (País Llionés ou País Llïonés en leonés)^[1] é, segundo os rexionalistas leoneses, o territorio formado polas provincias españolas de León, Zamora e Salamanca, onde se estenden a lingua e cultura leonesas. Coincide co Reino de León definido na división administrativa realizada por Javier de Burgos por medio do Real Decreto de 30 de novembro de 1833,^[2] pero a súa definición non coincide plenamente co reino de León histórico pois este abranguía un territorio máis extenso.

País Leonés

Localización
42°27′49″N 6°03′42″O
Estado	España
Comunidade autónoma	Castela e León

Bandeira leonesista vencellada á esquerda política.

Bisbarras do País Leonés

Porén, os límites do País Leonés non son de todo precisos, pois algúns sectores leonesistas inclúen neste territorios do pasado histórico do Reino de León ou de proclamada cultura leonesa (principalmente aqueles nos que se falan variantes do asturleonés). Deste xeito, formarían tamén parte do País Leonés a Franxa do Carrión (Palencia), a marxe dereita do río Valderaduey (Valladolid), a franxa occidental da provincia de Valladolid, Valdeorras (Ourense), e a bisbarra do Barco de Ávila (Ávila)^[3][4], onde se falaría asturleonés oriental; e os territorios portugueses do río Sabor (Sendim e Miranda do Douro, onde falan unha variante do asturleonés occidental coñecida como mirandés, que é oficial en Portugal).^[5]