Peitoril

O peitoril ou antepeito^[1], como elemento arquitectónico, é a parede que pecha a parte inferior dunha fiestra. Tamén adoita designar o parapeto ou muro, á altura do peito, que se coloca como protección en balcóns, terrazas, pozos, beiras das pontes etc. Sendo designada normalmente de varanda cando está formada por unha armazón de madeira, ferro, ou outro material^[2] Por extensión a repisa que forma o oco dunha ventá na parte inferior onde se apoian as persoas recibe os nomes de peitoril, antepeito ou soleira.

Fiestra con parladoiro nunha casa en Padrón onde se olla o peitoril.

Apartadoiro con asento e peitorís na ponte de Bermaña en Caldas de Reis (Pontevedra).

Antepeito do tipo Super-Rail (esquerda) nunha estrada.

Pozo con peitorís de pedra no Convento de San Francisco, na Coruña.

Ademais antepeito ou peitoril é o elemento de protección que se coloca nun lugar perigoso, normalmente por estar na beira dun desnivel, formando unha barreira que ofrece unha seguranza tanto psicolóxica como real^[3].

Tipos de peitoril

Entre os diversos tipos de peitoril, poden diferenciarse, segundo os materiais:

• Peitorís arquitectónicos de pedra natural, cantaría ou cachotaría.
• Peitorís de formigón armado, moi frecuentes nas pontes e viadutos de autovías e autoestradas. Poden ser de cara exterior recta ou curva.
• Peitorís de metal, tamén habituais no trazado das estradas de circulación interurbanas.^[4]
• Peitorís mixtos.