Quetzal

Os quetzais^[1][2] (Pharomachrus) son un xénero de aves da familia dos trogónidos (Trogonidae). Teñen unha dieta variada, que inclúe moitos froitos (sobre todo das árbores lauráceas) e tamén insectos e ras. O seu hábitat é a selva montañosa, en espazos húmidos. Xeralmente poñen dous ovos (cor azul pálida) por niñada no buraco dunha árbore.^[3][4]

Quetzal
Pharomachrus mocinno
Clasificación científica
Reino: Animalia Filo: Chordata Clase: Aves Orde: Trogoniformes Familia: Trogonidae Xénero: Pharomachrus
Especies
P. antisianus P. auriceps P. fulgidus P. mocinno P. pavoninus

Até anos recentes, creuse que o quetzal non podía procrear nin vivir moito tempo en cativerio, polo que é un símbolo tradicional da liberdade. Porén, no 2004 anunciouse que uns quetzais tiveron crías nun aviario privado de Ixtapaluca (Estado de México), administrado pola Fundación Vida Silvestre Dr. Estudillo López.^[5][6]

O quetzal é a ave nacional de Guatemala e esta ave xoga un papel importante na mitoloxía prehispánica e moderna da rexión. Os reis e sumos sacerdotes anciáns levaban tocados de plumas de quetzal.

Etimoloxía

Na voz náhuatl, quetzal (que provén, á súa vez, de quetzalli) significa precioso ou belo; noutras voces mesoamericanas significa sacro ou erixido. Segundo o American Heritage Dictionary, quetzalli pode traducirse como «cola longa de plumas brillantes» e, segundo o Merriam-Webster Collegiate Dictionary, como «cola cuberta do quetzal». En canto á súa clasificación latina, Pharomachrus provén do grego antigo pharos, «manta», e makros, «longo», en referencia á aleta e cola cuberta da ave.

Taxonomía

Pharomachrus auriceps

Aínda que todas as especies do xénero Pharomachrus chámanse quetzais, a palabra soa usábase orixinalmente para denominar ó Pharomachrus mocinno, o quetzal centroamericano ou mesoamericano. En total, coñécense cinco especies:

• o quetzal centroamericano, Pharomachrus mocinno;
• o quetzal cristado ou de cola branca, Pharomachrus antisianus;
• o quetzal de cabeza dourada, Pharomachrus auriceps;
• o quetzal fúlxido ou dourado, Pharomachrus fulgidus;
• o quetzal pavonino ou de cola negra, Pharomachrus pavoninus.