Měšćanske dźěle Budyšina
From Wikipedia, the free encyclopedia
Město Budyšin wobsteji wot lěta 2020 z 29 měšćanskich dźělow (do toho 25). Do jadroweho města słušeja Nutřkowne město, Sewjerowuchodny wobkruh, Strowotna studnja, Wuchodne předměsto, Južne předměsto a Zapadne předměsto (tak mjenowane „nowe město“).
Po wobydlerstwje najwjetši dźěl města je Sewjerowuchodny wobkruh, kotryž leži wuchodnje a sewjernje Nutřkowneho města. Tam bydli wjace hač štwórćina Budyskeho wobydlerstwa. Najmjeńši dźěl je wjeska Nowe Małsecy na sewjeru měšćanskeho teritorija. Přerězna staroba Budyšanow wučini w lěće 2011 46,5 lět, štož wotpowěduje přibližnje sakskemu přerězkej. Najmłódše wobydlerstwo mějachu tehdy Ćemjercy (39,6 lět), Lešawa (39,7) a Nutřkowne město (40,9). Najstarše wobydlerstwo bydleše w Nadźanecach (50,6 lět), Debrikecach (50,3) a we Wuchodnym předměsće (50,3).