Wulki kruh
From Wikipedia, the free encyclopedia
Wulki kruh je tak wulki kaž móžno kruh na kulowym powjerchu. Jeho srjedźišćo pada přeco ze srjedźišćom kule hromadźe a rěz na wulkim kruhu dźěli kulu na kóždy pad do dweju („jenak wulkeju“) połojcow. Dokelž je přewšo wjele móžnosćow, kulu takle rozrězać, zo by rězna płonina srjedźišćo kule trjechiła, je tež přewšo wjele wulkich kruhow. Wosebity pad wulkich kruhow su meridiany, kotrež su poł wulkeho kruha, kotrež so wot sewjerneho do južneho čopa wupřestrěwaja.
W geografiskim koordinatowym systemje zemje su ekwator (módry) kaž tež kóždy por jednoho druhemu „napřećo ležacych“ stopnjow dołhosće wosebje ležace wulke kruhi (stopnje dołhosće = meridiany, tu žołte), na př. nulowy meridian (0°) a meridian 180°. Šěrokostniki pak (smužkowane linije) z wuwzaćom ekwatora wulke kruhi njejsu, ale mjeńše hač maksimalny wobjim kule. Rěkaja tohodla pódlanske abo małe kruhi.
Na wulkich kruhach zemje wotpowěduje jedna łukowa mjeńšina jednej mórskej mili, skrótšenej sm (jendź. nautical mile, nm abo NM). Da so (tuž jako „dołhostna mjeńšina“ resp. jako „šěrokostna mjeńšina na ekwatorje“) z 1.852 metrami při předpokładowanym zemskim wobjimje 40.000 km wobličić. Přerězny zemski radius je 6.371 km.
Najkrótši zwisk mjez dwěmaj dypkomaj na kulowym powjerchu – tak mjenowana ortodroma – je přeco dźěl wulkeho kruha (tak mjenowany hłowny wobłuk). Tohodla du ruty łódźnistwa a předewšěm lětanske ruty zwjetša podłu wulkich kruhow. Wobjědźenje zemskeje kule na ortodromach rěka płachtakowanje na wulkich kruhach; „kursy wulkich kruhow“ docpěwaja trochu wjetše šěrokosće hač wotpowědowacy startowy a cilowy dypk (na př. Mnichow–Peking přez Sibirsku).
Na zemskim elipsoidźe a druhich płoninach rěka ortodroma geodetiska linija. Wona je křiwica wjetšeho rjada (wotchilenje wot wulkeho kruha kule wo něšto promilow) a wotpowěduje přeběhej jara napjateje niće bjez rybowanja.