Kambodźa

Kambodźa (hamtsce Kralestwo Kambodźa; khmer: ព្រះរាជាណាចក្រកម្ពុជា, Preăh Réachéanachâk Kâmpŭchéa) je njewotwisne kralestwo w juhowuchodnej Aziji. Stolica a zdobom najwjetše město je Phnom Penh při Mekongu, jednej z dźesać najdlěšich rěkow na swěće. Kraj słuša k najchudšim krajam w regionje.

Swjatnišćo Angkor Wat, dźěl swětoweho herbstwa

12.73105.66

Kralestwo Kambodźa

zakładne daty:
swójske mjeno	ព្រះរាជាណាចក្រកម្ពុជា (Preăh Réachéanachâkr Kâmpŭchea)
stolica	Phnom Penh
přestrjeń	181.040 km²
wobydlerstwo	15.709.000 (2015)[1]
hustosć	86,8 wob./km²
forma knježerstwa	konstitucionelna wólbna monarchija
hłowa stata	kral Norodom Sihamoni
šef knježerstwa	premier Hun Sen
měna	riel
hamtska rěč	khmeršćina
hymna	Nokoreach‬
časowe pasmo	UTC+7
njewotwisnosć	1953 wot Francoskeje
Top Level Domain	.kh
telefon	+855
Połoženje Kambodźe na zemi
Karta
p • d • w

Zakład Kambodźe běše srjedźowěkowske mócnarstwo Kambuja mjez 9. a 15. lětstotkom, kotrehož powostanki kaž na přikład swjatnišćo Angkor Wat słušeja dźensa k swětowemu herbstwu UNESCO. Po njewotwisnosći Kambodźe wot Francoskeje slědowachu lětstotki byrgarskeje wójny a surowe knjejstwo „Čerwjenych khmer“ wot 1975 do 1979, w kotrymž zamordowachu něhdźe 2 milionaj wobydlerjow.

Geografija

Powětrowy wobraz stolicy Phnom Penh

Kambodźa leži na Indochinskej połkupje při sewjerowuchodnym pobrjoze Thailandskeho zaliwa. Mjezuje z Laosom na sewjerowuchodźe, z Vietnamom na wuchodźe a z Thailandskej na sewjerozapadźe. Na juhozapadźe twori 443 kilometrow dołhi pobrjóh Thailandskeho zaliwa přirodnu hranicu. Do Kambodźe słuša nimo toho 64 kupow.

Wosrjedź kambodźaskeje wužłobiny, na třoch bokach wot horinow wobmjezowaneje, leži wulki a niłki jězor Tonle Sap, kiž přeměnja swoju wulkosć wot 2.500 km² w suchim počasu na něhdźe 20.000 km² w dešćowym počasu.

Najwyši dypk Kambodźe je wjeršk hory Phnom Aural (1813 m) w Kardamomskich horinach.

Města

(ličby wobydlerstwa su trochowanja z lětow 2008/10)

• Phnompenh – hłowne město (1,5 mil. wobydlerjow)
• Battambang (180.000)
• Siem Reap (172.000)
• Kompong Cham (118.000)
• Sihanoukville (Preah Seihanouk, prjedy Kompong Som) – mórski přistaw (90.000)