Կատվիկը Լիզյուկովի փողոցից

«Կատվիկը Լիզյուկովի փողոցից» (ռուս.՝ «Котёнок с улицы Лизюкова»), 1988 թվականին նկարված մուլտիպլիկացիոն ֆիլմ՝ ստեղծված ռեժիսոր Վյաչեսլավ Կոտյոնոչկինի կողմից^[1]։ Սցենարի հեղինակը Վիտալի Զլոտնիկովն է^[2]։

Կատվիկը Լիզյուկովի փողոցից ռուս.՝ Котёнок с улицы Лизюкова
Տեսակ	մուլտֆիլմ
Ժանր	հեքիաթ
Կերպարներ	կատու
Ռեժիսոր	Վյաչեսլավ Կոտյոնոչկին
Սցենարիստ	Վիտալի Զլոտնիկով
Հնչյունավորում	Վյաչեսլավ Նևիննի, Մարգարիտա Կորաբելնիկովա, Օլգա Արոսևա և Վլադիմիր Սոշալսկի
Բեմադրող նկարիչ	Ալեքսեյ Կոտյոնոչկին
Երաժշտություն	Վլադիմիր Միգուլյա
Երկիր	ԽՍՀՄ
Լեզու	ռուսերեն
Ընկերություն	Սոյուզմուլտֆիլմ
Դիստրիբյուտոր	Սոյուզմուլտֆիլմ
Տևողություն	555 s
Սիկվել	Կատվիկը Լիզյուկովի փողոցից 2
Թվական	1988

1992 թվականին «Կինոկենտրոն» համամիութենական ստեղծագործական-արտադրական միությունը հրատարակել է «Կատվիկը Լիզյուկովի փողոցից» մուլտֆիլմի մոտիվներով գրված մանկական գիրք, որի տեքստի հեղինակն է մուլտֆիլմի սցենարի հեղինակ Վիտալի Զլոտնիկովը, իսկ որպես նկարիչ հանդես են եկել մուլտֆիլմի բեմադրող նկարիչ Ալեքսեյ Կոտյոնոչկինը^[3]։

Սյուժե

Վորոնեժի Լիզյուկովի փողոցում ապրում է Վասիլի կատվիկը, որն ստիպված է մշտապես զգուշանալ բակային շներից, այդ պատճառով էլ երազում է վերածվել այնպիսի գազանի, որից բոլորը վախենան։ Այդ հարցում նրան օգնում է կախարդ ագռավը, որն անմիջապես բացում է «Կոոպերատիվ կերպարանափոխումների գծով»։ Վասյան տեղափոխվում է Աֆրիկա և վերածվում գետաձիու։ Կատվիկ-գետաձին ծանոթանում է փղի և այլ կենդանիների հետ, բայց այդպիսի կերպարանափոխությունը նրա մոտ առանձնակի հիացմունք չի առաջացնում։ Նա պատահաբար զայրացնում է առյուծին (շեղելով նրան իր զոհից՝ գնու այծքաղից), փրկում ջայլամին կոկորդիլոսից (բայց հետո նրանից ստանում է ուժեղ աքացի) և վերապրում ջրհեղեղ։ Կարոտելով իր հայրենիքը՝ գետաձին ծառերի ու ժայռերի վրա կախում է «Լիզյուկովի փողոց» ցուցանակներ, ինչպես Վորոնեժի տների պատերին էին։

Մի անգամ այդ վայրով անցնում է ծանոթ ագռավը՝ փնտրելով հաճախորդներ։ Գետաձին արցունքն աչքերին հայտարարում է, որ ցականում է նորից կատու դառնալ։ Ագռավը Վասյային վերադարձնում է տուն իր նախնական տեսքով։ Դրանից հետո նա արդեն չէր վախենում շնից, այլ ինքն էր նրան սարսափեցնում գետաձիու մռնչոցով։

Դերերը հնչյունավորել են

• Վյաչեսլավ Նեվիննի — Վասյա
• Մարգարիտա Կորաբելնիկովա — ագռավ
• Օլգա Արոսևա — փիղ
• Վլադիմիր Սոշալսկի — առյուծ

Երաժշտություն

Մուլտֆիլմում հնչում է «Если вы котёнок» (հայ․՝ «Եթե դուք կատվիկ եք») երգը, որի երաժշտությունը հեղինակել է Վլադիմիր Միգուլյան, տեքստը՝ Վ. Զլոտնիկովը։

Մուլտֆիլմի վրա աշխատել են

• Նկարիչ-մուլտիպլիկատորներ՝ Գալինա Զոլոտովսկայա, Ալեքսեյ Բուկին, Տատյանա Պոմերանցևա, Վլադիմիր Շևչենկո, Ֆեոդոր Ելդինով, Ալեքսանդր Դորոգով
• Նկարիչներ՝ Սերգեյ Մարակասով, Տատյանա Մակարովա, Վիկտորյա Մակինա
• Ռեժիսորի օգնական՝ Տ. Գալկինա
• Մոնտաժող՝ Մարգարիտա Միխեևա
• Խմբագիր՝ Ելենա Նիկիտկինա
• Տնօրեն՝ Լիլիանա Մոնախովա

Հետաքրքիր փաստեր

• Ըստ փղի նշած կոորդինատների (հարավային լայնության 7 աստիճան, արևելյան երկայնության 30 աստիճան՝ 7°00′ հվ. լ. 30°00′ ավ. ե.^HGЯOL), կատվիկը ճանապարհորդում է Տանգանիկա լճի մոտակայքում (Կենտրոնական Աֆրիկա)։
• 2003 թվականի դեկտեմբերի 5-ին Վորոնեժի Լիզյուկովի փողոցում տեղի է ունեցել Վասիլի կատվի հուշարձանի հանդիսավոր բացման արարողությունը^[4]։
• 2016 թվականի կեսերին Վորոնեժի Wizart Animation ստուդիան «Սոյուզմուլտֆիլմի» հետ միասին սկսել է «Կատվիկը Լիզյուկովի փողոցից 2» 3D-մուլտֆիլմի նկարահանումները՝ նախատեսելով այն թողարկել 2017 թվականին։ Մուլտֆիլմը բեմադրվել է Վիտալի Զլոտնիկովի սցենարով և դարձել է օրիգինալ մուլտֆիլմի շարունակությունը^[5]։