Հրանտ Շահինյան

Հրանտ Համազասպի Շահինյան (հուլիսի 30, 1923(1923-07-30)^[1][2], Գյուլագարակ, Բորչալուի գավառ, Վրացական Սոցիալիստական Խորհրդային Հանրապետություն, ԱԽՖՍՀ, ԽՍՀՄ^[2] - մայիսի 29, 1996(1996-05-29), Երևան, Հայաստան)^[3], hայ խորհրդային մարմնամարզիկ, ԽՍՀՄ սպորտի վաստակավոր վարպետ (1951), ՀԽՍՀ վաստակավոր մարզիչ (1961), ՀԽՍՀ ֆիզկուլտուրայի և սպորտի վաստակավոր գործիչ (1966)։ ԽՍՀՄ յոթակի չեմպիոն, բացարձակ չեմպիոն, աշխարհի կրկնակի ոսկե դափնեկիր, Օլիմպիական խաղերի (Հելսինկի 1952) կրկնակի ոսկե մեդալակիր և կրկնակի արծաթե մեդալակիր^[4][5]։

Վիքիպեդիայում կան հոդվածներ Շահինյան ազգանունով այլ մարդկանց մասին։

Հրանտ Շահինյան
Անձնական տեղեկություն
Սեռ՝	արական
Ազգություն	հայ
Մասնագիտացում	սպորտային մարմնամարզիկ
Երկիր	ԽՍՀՄ և  Հայաստան
Ծննդյան ամսաթիվ	հուլիսի 30, 1923(1923-07-30)[1][2]
Ծննդավայր	Գյուլագարակ, Բորչալուի գավառ, Վրացական Սոցիալիստական Խորհրդային Հանրապետություն, ԱԽՖՍՀ, ԽՍՀՄ[2]
Մահվան ամսաթիվ	մայիսի 29, 1996(1996-05-29) (72 տարեկան)
Մահվան վայր	Երևան, Հայաստան
Պարգևներ ՀԽՍՀ ֆիզկուլտուրայի և սպորտի վաստակավոր գործիչ և

Կենսագրություն

Ծնվել է Ստեփանավանի շրջանի Գյուլագարակ գյուղում։ 1930 թվականին նրանց ընտանիքը տեղափոխվել է Երևան, որտեղ Հրանտն սկսել է հաճախել մարմնամարզության խմբակի պարապմունքներին (մարզիչ՝ Հարություն Գարգալոյան)։ 1939 թվականին նվաճել է ԽՍՀՄ պատանիների բացարձակ չեմպիոնի տիտղոսը։

Հայրենական մեծ պատերազմի առաջին իսկ օրերից կամավոր մեկնել է ռազմաճակատ, 1943 թվականին վիրավորվել ոտքից և միայն 1946 թվականից է կարողացել վերսկսել մարմնամարզության մարզումները։

Հետաքրքիր փաստեր

• Մարմնամարզության համաշխարհային ֆեդերացիայի որոշմամբ Հրանտ Շահինյանի առաջինը կատարած վարժություններից մեկը կոչվում է «Շահինյանի պտուտան»։
• ԽՍՀՄ-ում առաջինը Շահինյանի պատվին հիմնադրվեց օլիմպիական հերթափոխի մասնագիտացված մարզադպրոց^[6]։

Մարզական նվաճումներ

Հրանտ Շահինյանի հուշարձանը Շահինյանի անունը կրող մարմնամարզության օլիմպիական մանկապատանեկան մարզադպրոցի առջև

• Օլիմպիադա - Հելսինկի, 1952 թ.
  • Ոսկե մեդալ թիմային հաշվարկում
  • Ոսկե մեդալ օղակներով վարժության համար
  • Արծաթե մեդալ անհատական հաշվարկում
  • Արծաթե մեդալ նժույգի վրա կատարած վարժության համար
• Աշխարհի առաջնություն - Հռոմ, 1954 թ.
  • Ոսկե մեդալ նժույգի վրա կատարած վարժության համար
  • Ոսկե մեդալ թիմային հաշվարկում
  • Բրոնզե մեդալ անհատական հաշվարկում

Պարգևներ

• Հայրենական պատերազմի շքանշան՝ 2-րդ աստիճանի (6.11.1985).
• Աշխատանքային կարմիր դրոշի շքանշան (27.04.1957).
• «Պատվո նշան» շքանշան (1968).
• «Աշխատանքային արիության համար» մեդալ (26.09.1960).
• «Կովկասի պաշտպանության համար» մեդալ (26.07.1945).
• ԽՍՀՄ սպորտի վաստակավոր վարպետի կոչում (1952).
• Հայկական ԽՍՀ վաստակավոր մարզիչի կոչում (1961).
• Հայկական ԽՍՀ ֆիզկուլտուրայի և սպորտի վաստակավոր գործիչ (1966).

Հիշատակ

• Հրանտ Շահինյանի փողոց Երևանում^[7]
• Հրանտ Շահինյանի անունն է կրում ֆիզկուլտուրայի հայկական պետական ինստիտուտի մարմնամարզության ամբիոնը։
• Հայաստանում 2000 և 2009 թվականին թողարկվել են Հրանտ Շահինյանին նվիրված փոստային դրոշմանիշներ^[8][9]։
• 2014 թվականի հոկտեմբերին Երևանում՝ Միջազգային օլիմպիական կոմիտեի նախագահ Թոմաս Բախի ներկայությամբ, բացվել է Հրանտ Շահինյանի հուշարձանը^[10]։