Tamar (rivero en Anglia)
From Wikipedia, the free encyclopedia
La Tamar (pr. teima(r), kornwalana: Dowr Tamar) esas rivero en sudwesta Anglia, quo formacas grandaparte la frontiero inter la komtii Devon (este) e Kornwal (weste). La areo dil rivero esas UNESCO Mondala Heredajo-Situo pro sua historiala min-aktivesi.
La fonto dil Tamar distas min kam 6 km de la norda kornwalana marbordo, ma ol fluas adsude ed olua voyo transiras la peninsulo a la suda marbordo. La tota longeso dil rivero esas 98 km. En sua ekflueyo, Tamar fluas aden la Hamoaze ante enirar Plymouth Sound, bayo en la Kanalo. Enfluanta riveri di Tamar inkluzas la riveri Inny, Ottery, Kensey e Lynher (o St Germans Rivero) ye la Kornwalana latero, e la Deer e Tavy ye la Devonana latero.
La nomo Tamar (o Tamare) mencionesis da Ptolemeo en la duesma yarcento en lua Geografio. La nomo supozeble signifikas "Granda Aquo." Tamar esas un ek plura riveri en Britania, di qui la anciena nomo supozesas devenar de prehistoriala rivero-vorto qua signifikis "tenebroze fluanta", quale anke la Fluvio Thames.
La 7ma yarcenta Kosmografio di Ravenna mencionas romana kolonio kun la nomo Tamaris, ma esas neklara qua urbon alonge Tamar ica nomo referas. Plymouth, Launceston e la romana fuorto en Calstock omna sugestesis.