Pönnukaka

Pönnukaka er örþunn kaka úr hveiti, eggjum og mjólk. Úr þessum afurðum er búin til soppa. Pönnukökur eru oftast bakaðar á pönnu, annaðhvort á skaftpönnu eða frístandandi rafmagnspönnu. Íslensku pönnukökur eru oftast borðaðar með strásykri eða sultu og þeyttum rjóma. Pönnukökur eru til í flestum nágrannalöndum okkar en þar eru þær oftast þykkari en þær íslensku og minna jafnvel á lummur.

Pönnukökubakarí á 16. öld

Pönnukökur í bakstri.

Uppskrift

Til eru margar uppskriftir að pönnukökum. Eftirfarandi uppskrift er fengin úr bók Helgu Sigurðardóttur.

• 250 gr. hveiti
• 40 gr. smjörlíki
• 1 tsk lyftiduft
• 1/2 tsk. sódaduft
• 1/2 tsk. salt
• 6-7 dl mjólk
• 2 egg
• vanilludropar eftir smekk

Þessu er öllu hrært vel saman í þunna hræru. Gott er að nota þeytara til þess. Bakað á pönnukökupönnu við góðan hita. Pönnukökurnar má vefja upp með sykri eða sýrópi. Einnig er afar vinsælt að bera þær fram með þeyttum rjóma og berjasultu.

Pönnukökubakstur á þremur pönnum í einu.

Tenglar

• Pönnukökur; grein í Morgunblaðinu 1987

Heimildir

• Hallgerður Gísladóttir (1999). Íslensk matarhefð. Mál og menning, Reykjavík.
• Helga Sigurðardóttir (1986). Matur og drykkur. Mál og menning, Reykjavík.