Tröll

Tröll er í þjóðtrú stórvaxin ómennsk vera í mannsmynd sem oft býr upp til fjalla eða í fjalli. Oftast er gerður greinarmunur á hugtökunum tröll, jötunn og risi, þó að stundum skarist merking þeirra og skil geti verið óljós. ^[1]

Troll och Tuvstarr (Tröll og prinsessan Tuvstarr), eftir John Bauer, 1915

Lagaákvæði um tröll

Í Gulaþingslögum og kristinrétti Sverris konungs segir, að sé konu kennt, að hún sé tröll og mannæta og verði hún sönn að því, skuli færa hana á sæ út og höggva á hrygg.^[2]

Í kafla um níðingsverk í Jónsbók er talið á meðal óbótamála að vekja upp tröll og fremja heiðni með því.^[3] Páll Vídalín lögmaður skýrði þetta: „Hér merkir tröll eftir sinni náttúru anda óhreina, uppvakta drauga, evocatos manes, immundos spiritus et spectra omnis generis." Hann nefndi fleiri merkingar orðsins tröll og skýrði þær með dæmum.^[4].