ნოა ბაუმბახი

ნოა ბაუმბახი (ინგლ. Noah Baumbach; დ. 3 სექტემბერი, 1969, ნიუ-იორკი, ნიუ-იორკის შტატი, აშშ) — ამერიკელი რეჟისორი, სცენარისტი და პროდუსერი. ოსკარზე ნომინირებული იყო ორჯერ საუკეთესო ორიგინალური სცენარის კატეგორიაში, ფილმებისთვის „კალმარი და ვეშაპი“ (2005) და „ქორწინების ისტორია“. ასევე მის გადაღებულ ფილმებს მიეკუთვნება „მარგო ქორწილში“ (2007), „საყვარელი ფრენსისი“ (2012), „სანამ ახალგაზრდები ვართ“ (2014) და „მაიროვიცის ოჯახის ისტორიები“ (2017).

ნოა ბაუმბახი
დაბადების თარიღი	3 სექტემბერი, 1969 ნიუ-იორკი, ნიუ-იორკის შტატი, ამერიკის შეერთებული შტატები
საქმიანობა	რეჟისორი, სცენარისტი, პროდუსერი
აქტიური	1995-დღემდე
მეუღლე(ები)	ჯენიფერ ჯეისონ ლი (2005-2010)
პარტნიორ(ებ)ი	გრეტა გერვიგი (2011-)
შვილ(ებ)ი	2

ადრეული ცხოვრება

ბაუმბახი ბრუკლინში, ნიუ-იორკში დაიბადა. იგი რომანისტისა და კინოკრიტიკოსის, ჯონათან ბაუმბახისა და The Village Voice-ს კრიტიკოსის, ჯორჯია ბრაუნის მესამე შვილია. 1987 წელს დაასრულა ბრუკლინის მიდვუდის უმაღლესი სკოლა. 1991 წლამდე ვასარის კოლეჯში ინგლისური ფილოლოგიის მიმართულებით სწავლობდა.

კინო-კარიერა

ბაუმბახმა თავისი სადებიუტო ნამუშევარი 26 წლის ასაკში გადაიღო, რომლის სცენარისტიც თავად იყო. ფილმი, სახელწოდებით „წიხლის კვრა და ყვირილი“ 1995 წელს გამოვიდა და ის მოგვითხრობს ოთხი ბიჭის ისტორიას, რომლებიც კოლეჯში სწავლას ასრულებენ და ცხოვრების გაგრძელებაზე უარს ამბობენ. ფილმში მონაწილეობენ ჯოშ ჰამილტონი, კრის ეიგემენი და კარლოს სკოტი. მისი პრემიერა 1995 წელს ნიუ-იორკის კინოფესტივალზე შედგა.

დასტინ ჰოპმანი, ნოა ბაუმბახი, ემა ტომპსონი, ბენ შტილერი და ადამ სენდლერი კანის კინოფესტივალზე 2017 წელს.

მისი 2005 წელს გამოსული ფილმი, „კალმარი და ვეშაპი“, ნახევრადავტობიოგრაფიული ნამუშევარია და ასახავს ბაუმბახის ბავშვობას, მისი მშობლების განქორწინების გავლენას მასზე და მის ოჯახზე. ფილმში მშობლების როლს ჯონათან ლეთემი და ლორა ლინი ასრულებენ. „კალმარი და ვეშაპი“ წარმატებული გამოდგა და ის 2005 წელს სანდენსის კინოფესტივალსა და ოსკარზე საუკეთესო ორიგინალური სცენარის კატეგორიაში იყო ნომინირებული. ფილმი ასევე ნომინირებული იყო ოქროს გლობუსის 3 კატეგორიაში.

2019 წელს გამოვიდა ბაუმბახის შემდეგი ფილმი, სახელწოდებით „ქორწინების ისტორია“. ბაუმბახი მისი სცენარის ავტორი და რეჟისორია. ფილმში მთავარ როლებს ადამ დრაივერი, სკარლეტ იოჰანსონი, ლორა დერნი, ალან ალდა, რეი ლიოტა, ჯული ჰეგერტი და მერიტ ვევერი ასრულებენ. ფილმი მოგვითხრობს წყვილის, მსახიობისა (იოჰანსონი) და თეატრის რეჟისორის (დრაივერი) შესახებ.

გავლენები

ბაუმბახმა აღნიშნა, რომ ვუდი ალენმა მასზე „აშკარა გავლენა“ მოახდინა.^[1] როგორც რეჟისორი ამბობს, ფილმები „მანჰეტენი“ (1979, რეჟ. ვუდი ალენი), „ზელიგი“ (1983, რეჟ. ვუდი ალენი), და „დენი როუზის ბროდვეი“ (1984, რეჟ. ვუდი ალენი) მისთვის განსაკუთრებული მნიშვნელობის მატარებელია.^[2] ბაუმბახმა ასევე დაასახელა სხვა რეჟისორებიც, რომლებმაც ზემოქმედება იქონიეს მასზე: ერნსტ ლუბიჩი, მაქს ოფულსი, ჟან რენუარი, რობერტ ალტმენი, პიტერ ბოგდანოვიჩი, სპაიკ ლი, უიტ სტილმენი, სტივენ სპილბერგი და ფრანგული ახალი ტალღის რეჟისორები.^[3][4][5]

პირადი ცხოვრება

ბაუმბახი მსახიობ ჯენიფერ ჯეისონ ლის 2001 წელს შეხვდა. ისინი 2005 წლის 2 სექტემბერს დაქორწინდნენ და ჰყავთ შვილი, რომერი. ლიმ განქორწინების საბუთები 2010 წელს შეავსო, ხოლო საბოლოოდ, პროცესი 2013 წელს დასრულდა.^[6]

2011 წლის დასასრულს ბაუმბახმა რომანტიკული ურთიერთობა დაიწყო მსახიობ, მწერალ და რეჟისორ გრეტა გერვიგთან. ისინი ერთმანეთს 2010 წელს, „გრინბერგის“ გადაღებებზე შეხვდნენ. 2019 წელს მათ შვილი, სახელად ჰაროლდი შეეძინათ.^[7]

ფილმოგრაფია

წელი		ქართულად	მშობლიური სახელწოდება	როლი
1995	ფ	„წიხლის კვრა და ყვირილი“	Kicking and Screaming	რეჟისორი, სცენარისტი
1997	ფ	„უმაღლესი ეტაპი“	Highball	რეჟისორი, სცენარისტი
1997	ფ	„მისტერ ეჭვიანობა“	Mr. Jealousy	რეჟისორი, სცენარისტი, პროდუსერი
2005	ფ	„კალმარი და ვეშაპი“	The Squid and the Whale	რეჟისორი, სცენარისტი
2007	ფ	„მარგო ქორწილში“	Margot at the Wedding	რეჟისორი, სცენარისტი
2010	ფ	„გრინბერგი“	Greenberg	რეჟისორი, სცენარისტი
2013	ფ	„საყვარელი ფრენსისი“	Frances Ha	რეჟისორი, სცენარისტი, პროდუსერი
2014	ფ	„სანამ ახალგაზრდები ვართ“	While We're Young	რეჟისორი, სცენარისტი, პროდუსერი
2015	ფ	„ქალბატონი ამერიკა“	Mistress America	რეჟისორი, სცენარისტი, პროდუსერი
2015	ფ	„დე პალმა“	De Palma	რეჟისორი, პროდუსერი
2017	ფ	„მაიროვიცის ოჯახის ისტორიები“	The Meyerowitz Stories	რეჟისორი, სცენარისტი, პროდუსერი
2019	ფ	„ქორწინების ისტორია“	Marriage Story	რეჟისორი, სცენარისტი, პროდუსერი