ហ្គូ ចុកតុង

ហ្គោស ចុកតុង ជានាយករដ្ឋមន្ត្រីទី២របស់សាធារណរដ្ឋសិង្ហបុរី ដោយបន្តតំនែងពីលោក លី ក្វាន់យូ។ លោកកាន់តំនែងពីថ្ងៃទី ២៨ វិច្ឆិកា១៩៩០ ដល់ថ្ងៃទី១២ សីហា ២០០៤ ៖ គិតសរុបទាំងអស់រយៈពេល១៤ឆ្នាំ។ បច្ចុប្បន្នលោកជាព្រឹទ្ឋរដ្ឋមន្ត្រីនៃសិង្ហបុរី និងជាប្រធាន ធនាគារកណ្ដាលសិង្ហបុរី ដែលជាអាជ្ញាធម៌រូបិយវត្ថុសិង្ហបុរី។

ជីវប្រវត្តិ

លោក ហ្គោស ចុកតុង ចាប់កំនើតក្នុងគ្រួសារចិនហុកគានមួយ។ លោកសិក្សានៅវិទ្យាស្ថានរ៉ាហ្វហ្វលចាប់ពីឆ្នាំ១៩៥៥ ដល់ឆ្នាំ១៩៦០។ លោកបានទទួលសញ្ញាប័ត្រកិត្តិយសថ្នាក់ទី១(បរិញ្ញាប័ត្រសិល្បៈ)ផ្នែកសេដ្ឋកិច្ចពីសកលវិទ្យាល័យជាតិសិង្ហបុរី (ពេលនោះត្រូវបានគេស្គាល់ថាជាសកលវិទ្យាល័យសិង្ហបុរី) អនុបណ្ឌិតសិល្បៈផ្នែកអភិវឌ្ឍន៍សេដ្ឋកិច្ចពីមហាវិទ្យាល័យវិល្លៀមនៅសហរដ្ឋអាមេរិកក្នុងឆ្នាំ១៩៦៧។ បន្ទាប់ពីលោកបញ្ចប់ការសិក្សា លោកបានវិលត្រលប់មកសិង្ហបុរីវិញដើម្បីបំរើការងារក្នុងសេវាកម្មរដ្ឋបាល។

នៅឆ្នាំ១៩៦៩ លោកបានចូលបំរើការជាអ្នកគ្រប់គ្រងផែនការនិងគំរោងរបស់ Neptune Orient Lines (NOL)។ អាជីពរបស់លោកបានដុះដាលយ៉ាងខ្លាំង ហើយមិនដល់ឆ្នាំ១៩៧៣ផង លោកបានក្លាយជានាយកគ្រប់គ្រង និងដឹកនាំNOLទៅកាន់ភាពជោគជ័យផ្នែកហិរញ្ញវត្ថុ ដ៏គួរអោយកត់សំគាល់ ក្នុងពេល កាន់តំនែងរបស់លោក។

នៅក្នុងការបោះឆ្នោតសកលឆ្នាំ១៩៧៦នៅសិង្ហបុរី លោកត្រូវបានជាប់ឆ្នោតជាសមាជិកសភា ក្នុងនាមជាបេក្ខជនរបស់គណបក្សសកម្មភាពប្រជាជន (People's Action Party ហៅកាត់ថា PAP) ក្នុងអាយុ៣៥ឆ្នាំ។ លោកត្រូវបានគេតែងតាំងជាព្រឹទ្ឋរដ្ឋមន្ត្រីហិរញ្ញវត្ថុ។ នៅឆ្នាំ១៩៨១ លោកត្រូវបានតំលើងតំនែងជារដ្ឋមន្ត្រីជំនួញនិងឧស្សាហកម្ម។ ក្រោយមកលោកបានចូលកាន់តំនែងផ្សេងៗទៀតរួមមាន រដ្ឋមន្ត្រីសុខាភិបាល និងរដ្ឋមន្ត្រីការពារជាតិផងដែរ។

នៅឆ្នាំ១៩៨៥ លោកបានក្លាយជាឧបនាយករដ្ឋមន្ត្រីទី១ និងចាប់ផ្ដើមទទួលយកទំនួលខុសត្រូវ ជារដ្ឋភិបាល ក្នុងអំឡុងសម័យអន្តរកាល ផ្លាស់ប្ដូរថ្នាក់ដឹកនាំ ដែលត្រូវបានរៀបចំយ៉ាងម៉ត់ចត់មួយ។ បេក្ខជនដែលលោក លី ក្វាន់យូ ពេញចិត្តអោយបន្តតំនែងពីលោកគឺ លោក ថូនី ថានទេ។ ប៉ុន្តែលោក ហ្គោស ចុកតុងត្រូវបានមេដឹកនាំជំនាន់ទី២នានាក្នុងបក្ស(ក្នុងនោះមានលោក ថូនី ថាន ផងដែរ) សំរេចជ្រើសតាំងជាអ្នកបន្តវេនពីលោក លី ក្វាន់យូ។ លោក លី ក្វាន់យូ បានយល់ស្របតាមការសំរេចចិត្តនេះ។

នៅថ្ងៃទី ២៨ វិច្ឆិកា ១៩៩០ លោក ហ្គោស ចុកតុង បានក្លាយជានាយករដ្ឋមន្ត្រីទី២របស់សិង្ហបុរី បន្ទាប់ពីលោក លី ក្វាន់យូ។ លោក លី ក្វាន់យូ នៅតែជា សមាជិកដ៏មានឥទ្ឋិពលក្នុងគណៈរដ្ឋមន្ត្រី​ថ្មីដោយកាន់តំនែងជាព្រឹទ្ឋរដ្ឋមន្ត្រី។ នៅឆ្នាំ ១៩៩២ លោក លី ក្វាន់យូ បានផ្ទេរតំនែង ជាអគ្គលេខាធិការ បក្សទៅលោក ហ្គោស ចុកតុង ហើយអន្តរកាលនៃការផ្លាស់ប្ដូរថ្នាក់ដឹកនាំត្រូវបានបញ្ចប់ដោយជោគជ័យ។

ក្នុងឋានៈជានាយករដ្ឋមន្ត្រី លោក ហ្គោស ចុកតុងមានគំនិតបើកទូលាយនិងភាពជាអ្នកដឹកនាំដែលស្ដាប់ការប្រឹក្សា។ រដ្ឋាភិបាលរបស់លោកបាននាំយកនូវ គោលនយោបាយ សំខាន់ៗជាច្រើនមាន៖

• Medisave
• Non-Constituency Members of Parliament
• Government Parliamentary Committees
• Group representation constituency
• Nominated Members of Parliament
• Vehicle Quota Scheme
• Elected President
• Singapore 21

ក្រោមរដ្ឋបាលលោក ហ្គោស ចុកតុង សិង្ហបុរីបានជួបប្រទះនិងវិបត្តិជាច្រើនដូចជា វិបត្តិហិរញ្ញវត្ថុអាស៊ីឆ្នាំ១៩៩៧ ការគំរាមគំហែងភេរវកម្មនានារួមមានផែនការដាក់គ្រាប់បែកបំផ្ទុះស្ថានទូតនានានៅសិង្ហបុរី ឆ្នាំ២០០១ ការដើរថយក្រោយនៃសេដ្ឋកិច្ចពីឆ្នាំ២០០១ដល់២០០៣ និងការផ្ទុះឡើងការរីករាលដាលជំងឺសារស៍។

ក្នុងនាមជាអគ្គលេខាធិការបក្សលោក ហ្គោស ចុកតុងបានដឹកនាំគណបក្ស PAP អោយទទួលជោគជ័យក្នុងការបោះឆ្នោតសកលឆ្នាំ ១៩៩១ ១៩៩៧ និង ២០០១ ដោយទទួលបានសន្លឹកឆ្នោតគាំទ្រ ៦១% ៦៥% និង ៧៥%។ បន្ទាប់ពីការបោះឆ្នោតសកលឆ្នាំ២០០១មក លោកបានបញ្ជាក់ថាលោក​នឹងចុះចេញពីតំនែង​ជានាយករដ្ឋមន្ត្រីនៅពេលដែលលោកដឹកនាំប្រទេសចេញផុតពីការដើរថយក្រោយរបស់សេដ្ឋកិច្ចនេះរួច។

នៅថ្ងៃទី១២ សីហា ២០០៤ លោក ហ្គោស ចុកតុងបានចុះចេញពីតំនែងជានាយករដ្ឋមន្ត្រី និងចូលកាន់តំនែងជាព្រឹទ្ឋរដ្ឋមន្ត្រីក្នុងគណៈរដ្ឋមន្ត្រីរបស់លោក លី សៀនលូង។ នៅថ្ងៃទី ២០ សីហា ២០០៤ លោកបានក្លាយជាប្រធានអាជ្ញាធម៌រូបិយវត្ថុសិង្ហបុរី។

អំពីគ្រួសារ

លោក ហ្គោស ចុកតុង រៀបការជាមួយនឹងលោកស្រី តាន ចូឡេង និងមានកូនភ្លោះ២នាក់ ប្រុសម្នាក់ស្រីម្នាក់។ កូនប្រុសលោកឈ្មោះ ហ្គោស ជីនហៀន ជាវេជ្ជបណ្ឌិតនៅមន្ទីរពេទ្រម៉ោនត៍អេលីហ្សាបិត ចំនែកកូនស្រីរបស់លោកឈ្មោះ ហ្គោស ជីនថេង រស់នៅជាមួយស្វាមី លី ក្រាវិន នៅទីក្រុងឡុង។