Cyclon

Cyclon^[1] (a Graeco κυκλῶν 'vertens') est moles aeris, turbo atmosphaerae amplissimus (diametro usque ad milia chiliometrorum), qui ut ventorum systema in superficie Telluris videtur. In media cyclonis parte, regio pressionis atmosphaericae humilioris sita est.

Depressio Islandica, magnus cyclon extratropicus anno 2003 (photographema spatiale).

Cyclones semper de ipsa Telluris rotatione oriuntur; in hemisphaerio boreali, motu contrahorologico rotantur, hemisphaerio australi horologico. Super circulum aequinoctialem nunquam, in regionibus usque ad 8–10 gradus latitudinis australis vel borealis rarissime oriuntur.

Duo cyclonum genera sunt cyclones tropici, qui saepe typhones vel huracana nominantur, et extratropici. Hi maiores, sed minus periculosi sunt, nubes et imbres ferentes, illi minores, sed tempestates et destructiones maximas ferre possunt.

Anticyclonum, in quibus pressio atmosphaerica altior est quorumque motus in hemisphaerio boreali horologicus, in australi contra, natura et origo cyclonibus prorsus dissimilis est.