Ieredevisie (damesvoetbal)
From Wikipedia, the free encyclopedia
Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.
De Ieredevisie voetbal veur vrouwlui is sinds 2007 de hoegste aofdeiling vaan 't Nederlands damesvoetbal. Ietot de Ieredevisie woort opgeriech, gaof 't in Nederland gei professioneel voetbal door vrouwlui.
De Ieredevisie góng in 2007 vaan start mèt zès clubs. Diverse aandere waore toen, via jäögopleiinge, al e volweerdeg seniorevrouwe-èlftal aon 't veurbereie. In 2012 besloot de KNVB same mèt de KBVB 'n competitie veur de Benelux te make, de BeNe League. In 't ierste sezoen gaof 't nog apaarte aofdeilinge veur Nederland en 't Belsj; de kampioene späölde daonao tegenein. Daonao woorte de nationaol competities opgeluf en späölde alle profclubs vaan de Benelux 'n gewoen competitie. Oetindelek klapde de BeNe League in 2015; toen woort de Ieredevisie heropgeriech.
Recordkampioen is FC Twente, wat (BeNe League-sezoene mètgerekend) al ach kier 't kampioensjap heet behaold.
Clubs kinne neet oet de Ieredevisie degradere. Alle lieger devisies in 't vrouwevoetbal zien amateurdevisies, te beginne mèt de Topklas.